Նախորդ տարի արտադրված եւ այս տարի վաճառված ձվերի մասին

Նախաամանորյան օրերին երկրում ձվի դեֆիցիտ սկսվեց: Ձու գնելու համար մարդիկ հերթեր էին կանգնում, այն կրկնակի եւ ավելի բարձր գնով առնելու համար:

«Երկիր»-ը այս ամսվա 4-ին տեղեկացրել էր, որ շուկայում հայտնվել են դեկտեմբերի 22-ի արտադրության ձվեր, ինչը կարող է ապացույց լինել այն բանի, որ ձվի դեֆիցիտը արհեստական է եղել: Հավանական է, որ արտադրողներն այն պահել եւ շուկա են հանել տոներից հետո:

Այս մասին «Երկիր»-ը խոսեց Տնտեսական մրցակցության պաշտպանության պետական հանձնաժողովի նախագահի գլխավոր խորհրդական Արամ Սահակյանի հետ: Նա նախ նշեց, որ իրենք չեն հետեւել վաճառքի հանված ձվերի ամսաթվերին, այլ հետեւել են դրա խանութներում լինել-չլինելուն:

Սակայն նշեց նաեւ, թե իրենք հին արտադրության ձվերի վաճառքի զանգվածային դեպքեր չեն արձանագրել: Ա. Սահակյանը չի հերքում, որ եղել են նման դեպքեր, բայց դրանք եզակի են եղել:

Հավանական է, որ մասնավոր խանութը չի կարողացել իր ստացած ձուն ամբողջությամբ վաճառել մինչեւ Ամանորը եւ այն շարունակել է վաճառքի հանել նաեւ տոներից հետո:

Հանձնաժողովը արձանագրել է նաեւ, որ սեւ շուկայում այդ օրերին ձուն վաճառվել է կրկնակի թանկ գնով, սակայն դեկտեմբերի 30-31-ից ձվի դեֆիցիտը սկսել է «մեղմվել», եւ այն վաճառվել է 50-60 դրամով: