Ձմեռային փառատոն. Հայաստան - 2010

Դեկտեմբերի 25-ին կմեկնարկի Ձմեռային Փառատոն Հայաստան 2010-ը: Փառատոնը կսկսվի Երեւանի քաղաքապետարանից Սիրահարների այգի շարժվող տոնական շքերթով:

Արդեն չորրորդ տարին է, Ձմեռային փառատոնն ուրախացնում է եւ´ փոքրերին, եւ´ մեծերին, իսկ այս տարի՝ առավել եւս, քանի որ միջոցառումների շարքը ընդլայնվել է, իսկ ամենամեծ նորույթը Կաղանդ պապն է, ով ամբողջ փառատոնի ընթացքում ներկա է լինելու միջոցառումներին:

Փառատոնի շրջանակներում լինելու են երաժշտական օրեր, անցկացվելու են հեքիաթասացություններ, խաղեր, բնապահպանական տոնածառների ցուցահանդես եւ այլ միջոցառումներ: Միջոցառումներն անցկացվելու են Սիրահարների այգում, իսկ մուտքն անվճար է լինելու:

Ձմեռային Փառատոն Հայաստան 2010-ի կարգախոսն է «Միասին գունավորենք ձմեռը», եւ կազմակերպիչները խոստանում են առաջնորդվելով այս կարգախոսով՝ ստեղծել տոնական տրամադրություն Երեւանի բնակիչների, ինչպես նաեւ հյուրերի համար:

Մի բան էլ, եթե պատրաստվում եք մասնակցել միջոցառումներին, տանից դուրս գալուց առաջ ձեզ հետ վերցրեք հին կամ նոր խաղալիքներ, գրքեր եւ գրենական պիտույքներ: Փառատոնի վերջում կազմակերպիչները այդ ամենը որպես բարեգործություն կուղարկեն «Զանգակատուն» հասարակական կազմակերպությանը, որն էլ իր հերթին իրերը կբաժանի իր ծրագրերում ընդգրկված երեխաներին: Այպիսով եւ´ դուք կզվարճանաք. եւ´ կուրախացնեք այդ իրերի կարիքն ունեցող երեխաներին: