Քննարկվել են մրցակցային պայմանների եւ ներդրումային միջավայրի հիմնախնդիրները

Հայաստանի հարկային եւ մաքսային վարչարարության, ներդրումային միջավայրի բարելավմանը, որակի միջազգային ստանդարտների ներդրմանը, արդար եւ հավասար մրցակցային պայմանների ստեղծմանն էր նվիրված այսօր տեղի ունեցած տնտեսական համագործակցության հարցերով հայ-ամերիկյան միջկառավարական հանձնաժողովի նիստը:

«Երկու հարցի վրա կենտրոնացանք` մեկը մակրոտնտեսական իրավիճակի գնահատումն է, եւ այն անելիքները, որոնք անհրաժեշտ են մակրոտնտեսությունը կայունացնելու համար: Եվ երկրորդը բիզնես միջավայրի խնդիրներն էին` մրցակցային դաշտի բարելավումը: Սրանք մեր օրակարգում են»,- ասաց ՀՀ էկոնոմիկայի նախարար Ներսես Երիցյանը:

Հանձնաժողովի համանախագահ ԱՄՆ Պետդեպարտամենտի Եվրոպայի եւ Եվրասիայի ամերիկյան օժանդակության ծրագրերի համակարգող Դենիել Ռոզենբլյումը նշեց, որ այս նիստի շրջանակներում առաջին անգամ քննարկումներ են եղել նաեւ բիզնես ոլորտի ներկայացուցիչների հետ: Վերջիններս բիզնեսի եւ ներդրումների ընդլայնման համար այնպիսի խնդիրներ են առաջ քաշել, որոնց մի մասը պետք է լուծվի ՀՀ, մյուս մասը ԱՄՆ կառավարության կողմից:

Նիստի շրջանակներում քննարկումներ էին անցկացվել նաեւ աշխատանքային չորս խմբեր: Առանցքային թեմաները եղել են, թե ինչպես երկու երկների միջեւ ընդլայնել առեւտուրը գյուղատնտեսական, առողջապահական, էներեգետիկայի եւ ջրային ռեսուրսների կառավարման ոլորտներում: Այս քննարկումների արդյունքում եկել են որոշակի եզրահանգումների, որոնք էլ զեկուցվել են նիստի ժամանակ:

Քննարկվել են նաեւ «Հազարամյակի մարտահրավերներ» ծրագրի շրջանակներում իրականցվող ծրագրերը: Ինչպես նշեց Դ. Ռոզենբլյումը, փորձել են ելքեր գտնել, որպեսզի գյուղատնտեսության եւ ջրօգտագործման ոլորտներում ձեռքբերումները շարունակելի լինեն: «Հազարամյակի մարտահրավերների» նախապես պլանավորված ոչ բոլոր ծրագրերն են իրականացվում ներկայումս, եւ այս իսկ պատճառով ՀՀ կառավարությունը ֆինանսավորման այլ աղբյուրներ է փորձում գտնել:

Նշենք, որ տնտեսական համագործակցության հարցերով հայ-ամերիկյան միջկառավարական հանձնաժողովը ստեղծվել է 2000 թվականին: Այն ՀՀ-ի եւ ԱՄՆ-ի միջեւ տնտեսական համագործակցությունը խորացնելու, առեւտրին ու ներդրումներին վերաբերող հարցերը քննարկելու, ՀՀ ֆինանսական ու շուկայական բարեփոխումներն առաջ մղելու, եւ Հայաստանի հեռանկարայաին տնտեսական զարգացման համար անհրաժշետ ԱՄՆ օժանդակության ոլորտները վերհանելու հարթակ է: