2017թ-ին իրականացվել է 856,5 մլն դոլար ծավալով ներդրումային և 170,9 մլն դոլար ծավալով մարզային ներդրումային ծրագրեր

ՀՀ կառավարությունը ներկայացրել է հաշվետվություն 2017թ Հայաստանում իրականացված ներդրումային ծրագրերի կատարողականի վերաբերյալ:

Այն ներառում է պետական, վարկային և դրամաշնորհային միջոցներով, ինչպես նաև մասնավոր, պետություն-մասնավոր հատված համագործակցությամբ իրականացված՝ ընդհանուր՝ 856,5 մլն դոլար ծավալով ներդրումային ծրագրեր, որոնք իրականացվել են գերատեսչությունների համակարգման ոլորտներում (գերատեսչությունների կողմից ներկայացված ներդրումների ծավալը ըստ ենթաոլորտների՝ Հավելվածում): Առանձին հատվածով ներկայացվում են նաև մարզերում իրականացված ծրագրերը, ընդհանուր՝ 170,9 մլն դոլար ծավալով, որոնք ներառված չեն վերոնշյալ 856,5 մլն դոլարի ծրագրերում:

Ըստ մոնիթորինգի արդյունքների՝ 2017թ. կատարվել է շուրջ 506 մլն. ԱՄՆ դոլարի ներդրում, որը ներառված է 856 մլն. դոլարի ներդրումների մեջ:

Տարածքային կառավարման և զարգացման նախարարության կողմից մարզպետարանների աջակցությամբ մարզերում իրականացված շուրջ 170 մլն ԱՄՆ դոլարի ծրագրերը բաժանվում են 2 հիմնական մասի՝

• Բիզնես ներդրումներ՝ արտադրական հզորությունների զարգացում կամ վերանորոգման աշխատանքների իրականացում, նոր արտադրական և հասարակական նշանակության շենքերի կառուցում, ջերմոցների և ինտենսիվ այգիների հիմնում,

• Բնակարանաշինություն, ենթակառուցվածքներ, դպրոցներ, մանկապարտեզներ, առևտրի և սպասարկման օբյեկտներ և այլ ծրագրեր: Ընդհանուր առմամբ մարզերում իրականացվել է 614 ծրագիր: