Վրաստանի ՊԱԾ-ն էլեկտրաէներգիայի զանգվածային անջատումների գործով հետաքննություն է սկսել «սաբոտաժի» հոդվածով

Ինչպես ավելի վաղ հայտնել էինք հուլիսի 24-ի գիշերը Վրաստանի գրեթե ամբողջ տարածքում տեղի էր ունեցել էլեկտրաէներգիայի լայնածավալ վթարային անջատում։ Հուլիսի 25-ի առավոտյան էլ երկրի մի շարք շրջաններում կրկին գրանցվել էր էլեկտրաէներգիայի կարճատև անջատում։

Այս իրադարձությունների ֆոնին Վրաստանի Պետական անվտանգության ծառայությունը (ՊԱԾ) հայտարարել է, որ քրեական օրենսգրքի 318-րդ հոդվածով՝ «Սաբոտաժ», հետաքննություն է սկսել։ Գերատեսչության տեղեկացմամբ՝ քննությունը վերաբերում է հուլիսի 24-ին և 25-ին ամբողջ երկրում տեղի ունեցած էլեկտրաէներգիայի վթարային և բազմակի անջատումներին։

Նշված հոդվածը վերաբերում է պետական ձեռնարկության կամ այլ կարևոր օբյեկտի բնականոն գործունեությանը խոչընդոտելուն կամ դրանց վնասմանը/ոչնչացմանը՝ պետության շահերին վտանգ ստեղծելու նպատակով։ ՊԱԾ-ն հայտնել է, որ հետաքննության ընթացքի վերաբերյալ հանրությանը տեղեկություններ կտրամադրի փուլ առ փուլ։

Աղբյուրը՝ vectornews.ge