Ջավախքի Փոքր Խանչալի գյուղում մեծ շուքով նշվեց Կաթնապրի տոնը

​Նինոծմինդայի շրջանի Փոքր Խանչալի գյուղը հյուրընկալորեն բացել էր իր դռները բոլորի առջև․ գյուղը մեծ խանդավառությամբ նշում էր ավանդական Կաթնապրի տոնը (կամ Ծաղկետոնը)։

​Տոնական արարողությանը ներկա էին բարձրաստիճան հյուրեր։ Կաթնապրի տոնի գեղեցիկ ավանդույթը Փոքր Խանչալի են բերել գյուղի նախնիները, ովքեր ժամանակին գաղթել են Էրզրումի նահանգի Դինարիգոմ, Մեղուս, Քյոշք և հարակից այլ գյուղերից։​

​Կաթնապուրը երկշաբաթյա տոնախմբություն է, որի յուրաքանչյուր դրվագ հագեցած է յուրահատուկ խորհրդով։

​ Տոնի սկիզբը դրվում է ծաղկաքաղով։ Երիտասարդները բարձրանում են «Ծաղկունանք» կոչվող վայրը, ծաղիկներ հավաքում, գեղեցիկ փնջեր ու ծաղկախաչեր հյուսում, ապա դրանք տուն առ տուն բաժանում համագյուղացիներին։

​Տոնն ունի ևս մեկ հետաքրքիր ու յուրօրինակ ծես։ Երիտասարդներն ընտրում են գյուղի «տատին ու պապին», ովքեր ստանձնում են տոնական միջոցառումը կազմակերպելու և ջահելներին համախմբելու առաքելությունը։

​Տոնական օրը մեկնարկում է վաղ առավոտյան՝ Թևաթորոս մատուռի շրջակայքում՝ ավանդական կլոր շուրջպարերով։ Ուշագրավ է, որ այս էրզրումյան պարերը պահպանվել են միայն Փոքր Խանչալիում և ներկայացնում են մշակութային հսկայական արժեք։

Նյութի աղբյուրը՝ Javakheti Georgia