«Մարալն ու հայրիկը Արցախում»․ պատմությունն Արցախի հանդեպ մեծ սիրո մասին է

Մայր Աթոռ Սուրբ Էջմիածնի Գյումրու Հայորդաց տանը տեղի ունեցավ Ծիլ տիկնիային ստուդիայի՝ «Մարալն ու հայրիկը Արցախում» գրքի հիման վրա բեմադրված առաջնախաղը։ Գրքի հեղինակն է Մարինե Չարշավճյանը, ով ամուսնու՝ Շանթ Չարշավճյանի հետ 44-օրյա պատերազմից հետո տեղափոխվել է Արցախ և այնտեղ շարունակել իր ստեղծագործական ու մարդասիրական գործունեությունը։

Պատմությունը իրական մեծ սիրո մասին է՝ Արցախի հանդեպ։ Հեքիաթը գրված է Արցախի Մարտունու ենթաբարբառով և ունի կարևոր կրթական ու դաստիարակչական նշանակություն։ Այն ներկայացնում է Մարտունին՝ իր պատմական կառույցներով, արձաններով ու հերոսներով՝ երեխաներին փոխանցելով հայրենասիրության, հիշողության և արժեքների կարևորությունը։

Հեքիաթի առանցքային ուղերձն այն է, որ երբ մարդը մտածում է մյուսի մասին, որևէ խոչընդոտ անլուծելի չի լինում։ Մարալի հայրիկը, իր փոքրիկ դստեր հետ, Նոր տարին վերածում է հեքիաթի՝ կերպարանավորվելով Կաղանդ պապի և Ձյունանուշի կերպարներով, գյուղ առ գյուղ շրջելով, նվերներ բաժանելով և երեխաներին հեքիաթ պարգևելով։

Գրքի վաճառքից ստացված հասույթով ձեռք են բերվել նվերներ, որոնք բաժանվել են Շիրակի մարզում հաստատված արցախցի երեխաներին:

Ծիլ տիկնիկային ստուդիան ծրագիրն իրականացրել է «Լորիկ» հիմնադրամի աջակցությամբ։

Տեղահանությունից ի վեր «Լորիկ» հիմնադրամն աջակցում է արցախցի ստեղծագործ խմբերին՝ շարունակելու իրենց գործունեությունը, համախմբված պահելով արցախցի փոքրիկներին՝ Արցախի մշակույթի ու կոլորիտի շուրջ։

Աղբյուրը՝ aparaj.am-ի