ՀՀ–ում «Նազիկ Ավդալյան» հիմնադրամ կստեղծվի. աշխարհի չեմպիոնը` ծրագրերի մասին

Ծանրամարտի աշխարհի և Եվրոպայի չեմպիոն, առաջին հայ կին աշխարհի չեմպիոն Նազիկ Ավդալյանն իր անվամբ սպորտի զարգացման հիմնադրամի կստեղծի։ Նա այդ մասին հայտնեց լրագրողների հետ հանդիպմանը։

Հիմնադրամը միտված է խթանելու առողջ կենսակերպը Հայաստանում, զարգացնելու սպորտային ենթակառուցվածքները և ներգրավելու հասարակության բոլոր շերտերին ֆիզիկական ու հոգեբանական զարգացման համապարփակ գործընթացում։

«Սպորտը ոչ միայն մարմնի, այլև հոգու ուժի ձևավորում է։ Մենք հավատում ենք, որ յուրաքանչյուր երեխա, երիտասարդ կամ մարզիկ պետք է ունենա հավասար հնարավորություն զարգանալու, ուժեղանալու և հաղթելու՝ անկախ իր պայմաններից կամ բնակության վայրից»,– ասաց նա։

Ավդալյանն ընդգծեց, որ հիմնադրամի գործունեության առանցքում առողջ ապրելակերպի տարածումն ու հանրային իրազեկվածության բարձրացումն է։ Այն նպատակ ունի զարգացնել սպորտային ենթակառուցվածքները, ստեղծել մարզասրահներ և վերականգնողական կենտրոններ, սպորտում ներգրավել սոցիալապես խոցելի խմբերին, սահմանամերձ և գյուղական համայնքների երիտասարդներին։

«Նազիկ Ավդալյան» հիմնադրամը նախաձեռնելու է նաև կրթական ծրագրեր, մրցաշարեր, նպաստելու է սպորտային հոգեբանության զարգացմանը։

Ավդալյանի խոսքով` հիմնադրամի առաքելությունն է ձևավորել ֆիզիկապես ու հոգեպես առողջ հասարակություն, որտեղ սպորտը դիտվում է ոչ միայն որպես հաղթանակի միջոց, այլև որպես կյանքի որակ բարձրացնող ուժ և հասարակական համերաշխության գործիք։