Կոլումբիայի նախագահը մեղադրել է ԱՄՆ-ին միջազգային իրավունքը խախտելու մեջ

Կոլումբիայի նախագահ Գուստավո Պետրոն շաբաթ օրը մերժել է Գազայում Իսրայելի պատերազմի վերաբերյալ քննադատության պատճառով իր վիզան չեղարկելու մասին ԱՄՆ-ի որոշումը և մեղադրել է Վաշինգտոնին միջազգային իրավունքը խախտելու մեջ, հաղորդում է Reuters-ը։

Ուրբաթ օրը ԱՄՆ-ն հայտարարել է Պետրոյի վիզայի չեղարկման մասին՝ այն բանից հետո, երբ նա դուրս է եկել Նյու Յորքի փողոցներ՝ միանալու պաղեստինամետ ցույցին և կոչ է արել ամերիկացի զինվորներին չհնազանդվել նախագահ Դոնալդ Թրամփի հրամաններին։

«Ես այլևս վիզա չունեմ ԱՄՆ մեկնելու համար։ Ինձ համար միևնույն է։ Ինձ վիզա պետք չէ… որովհետև ես ոչ միայն Կոլումբիայի քաղաքացի եմ, այլև Եվրոպայի քաղաքացի, և ես իսկապես ինձ ազատ մարդ եմ համարում աշխարհում», – գրել է Պետրոն սոցիալական ցանցերում։ «Այս որոշման ընդունումը՝ ցեղասպանությունը դատապարտելու համար, ցույց է տալիս, որ ԱՄՆ-ն այլևս չի հարգում միջազգային իրավունքը», – հավելել է նա։

Իսրայելը բազմիցս հերքել է Գազայում իր գործողությունների կապակցությամբ ցեղասպանության մեղադրանքները և հայտարարել է, որ գործում է ինքնապաշտպանության նպատակով։

Սովահար պաղեստինցիների, այդ թվում՝ երեխաների պատկերները ամբողջ աշխարհում վրդովմունք են առաջացրել Գազայի վրա Իսրայելի հարձակման կապակցությամբ, որի հետևանքով, ըստ Գազայի իշխանությունների, զոհվել է 65 000 մարդ, իսկ ամբողջ բնակչությունը դարձել է հարկադիր տեղահանված։ Մարդու իրավունքների բազմաթիվ փորձագետներ, գիտնականներ և ՄԱԿ-ի հետաքննություն իրականացրած մասնագետներ պնդում են, որ դա հավասարազոր է ցեղասպանության։

Պետրոն, դիմելով Մանհեթենում ՄԱԿ-ի կենտրոնակայանի մոտ հավաքված պաղեստինամետ ցուցարարներին, կոչ է արել ստեղծել գլոբալ զինված ուժեր, որոնց առաջնահերթ նպատակը կլինի պաղեստինցիների ազատագրումը, և կոչ է արել ամերիկացի զինվորներին «զենք չուղղել մարդկանց վրա։ Չհնազանդվել Թրամփի հրամաններին։ Հնազանդվել մարդասիրության հրամաններին»։