«Արևմուտք-2025». ՌԴ ՊՆ-ն տեսանյութ է հրապարակել զորավարժության հիմնական փուլի մասին

ՌԴ պաշտպանության նախարարությունը տեսանյութ է հրապարակել այսօր Նիժնի Նովգորոդի մարզի «Մուլինո» զորավարժարանում տեղի ունեցած ռուս-բելառուսական «Արևմուտք-2025» համատեղ ռազմավարական զորավարժության հիմնական փուլի մասին:

«Մուլինո» զորավարժարանում «Արևմուտք-2025» զորավարժությունների ընթացքին հետևել է Ռուսաստանի նախագահ Վլադիմիր Պուտինը:

Տեսանյութում ցուցադրվել են զորավարժության այս փուլին մասնակցած զինվորականների գործողությունները, ինչպես նաև հրաձգություն ցամաքային տեխնիկայից:

Հիշեցնենք՝ սեպտեմբերի 12-ին մեկնարկել է Բելառուսի և Ռուսաստանի զինված ուժերի «Արևմուտք-2025» համատեղ ռազմավարական զորավարժությունը: Զորավարժության ընթացքում մշակվում են Միութենական պետության դեմ ագրեսիայի տեղայնացման ընթացքում միջտեսակային, տարածաշրջանային և կոալիցիոն զորքերի (ուժերի) խմբավորումների կառավարման խնդիրներ, սպառնալիքների չեզոքացման և նրա սահմաններում իրավիճակի կայունացման համատեղ գործողությունների տարբերակներ: