Պուտինը պատրաստվում է ՆԱՏՕ-ի հետ մեծ պատերազմի. Գերմանական հետախուզություն

Գերմանիայի Դաշնային հետախուզական ծառայության (BND) և Բունդեսվերի նոր զեկույցում ասվում է, որ Ռուսաստանի իշխանությունները, ըստ երևույթին, ՆԱՏՕ-ի դեմ լայնամասշտաբ պատերազմի են պատրաստվում, գրում է Bild-ը։

Զեկույցում նշվում է, որ Կրեմլն Արևմուտքի հետ հարաբերություններն ընկալում է որպես համակարգային հակամարտություն և իր նպատակներին հասնելու համար պատրաստ է ուժ կիրառել։

Գերմանական հետախուզության տվյալներով՝ տասնամյակի վերջին Ռուսաստանը կարող է լիովին պատրաստ լինել «լայնածավալ կոնվենցիոնալ (ավանդական) պատերազմի»։

Միևնույն ժամանակ, Լիտվայի VSD հատուկ ծառայության գնահատմամբ, Մոսկվան դեռևս այն վիճակում չէ, որ հարձակվի ամբողջ դաշինքի վրա, բայց կարող է «փորձարկել ՆԱՏՕ-ն» դաշինքի մեկ կամ մի քանի երկրների դեմ սահմանափակ ռազմական գործողությամբ՝ պարզելու համար, թե դաշինքը որքանով լրջորեն կվերաբերվի իր պարտավորություններին։

Զեկույցում ընդգծվում է, որ չնայած Ուկրաինայում ռուսական զորքերի կենտրոնացմանը՝ ռուսական օդուժը և ռազմածովային ուժերը շարունակում են մարտունակ մնալ։

Եթե ​​Ուկրաինայում պատերազմն ավարտվի, ռուսական զորքերը կարող են արագ վերաբաշխվել Բալթյան երկրների հետ սահմաններին։

Փաստաթղթում նաև նշվում է, որ «ռուսական կորուստները համալրվում են», և երկրի պաշտպանական արդյունաբերությունը արտադրում է ավելին, քան պահանջվում է ընթացիկ հակամարտության համար։

Ռուսաստանի ռազմական ծախսերն աճում են ռեկորդային տեմպերով՝ 2025 թվականին այն կհասնի մոտ 120 միլիարդ եվրոյի, ինչը կազմում է ՀՆԱ-ի ավելի քան 6%-ը։ 2021 թվականի համեմատ ռազմական բյուջեն փաստացի աճել է չորս անգամ։

Կրեմլի ծրագրերով՝ բանակի թիվը պետք է հասնի 1,5 միլիոն մարդու, իսկ ՆԱՏՕ-ի հետ սահմանին զենքի և տեխնիկայի ծավալը պետք է ավելանա 30-50%-ով։