Գերմանական կուսակցությունն անցել է Հայաստանի կողմը. պատրաստվում է բանաձև. Աբաս Ջումա

Վերջերս Գերմանիայի «Այլընտրանք Գերմանիայի համար» խորհրդարանական խմբակցության անդամները (աջակողմյան կուսակցություն) ռուս-սիրիացի լրագրող Աբաս Ջումային ներկայացրել են Ղարաբաղում տիրող իրավիճակի` իրենց տեսլականը:

«Պատգամավորներն ամբողջությամբ անցել են Հայաստանի կողմը: Պատրաստվում է բանաձև, որի տեքստն ամբողջությամբ չեմ հրապարակելու: Բայց ահա մի հատված»,- իր թելեգրամյան էջում գրել է Ջուման:

«Էրդողանը հրահրել է հակամարտության բռնկում ադրբեջանցիների և հայերի միջև՝ արմատական գրոհայիններ ուղարկելով տարածաշրջան՝ ներկայացնելու իր նեոօսմանյան շահերը:

Գերմանիայի Բունդեսթագի ԱԳՀ խորհրդարանական խումբը սույնով կոչ է անում նախագահ Էրդողանին` սահմանափակել թուրքական ազդեցության տարածումը հարևան պետություններում: Եթե Թուրքիան շարունակի միջամտել այլ երկրների ներքին գործերին, մենք, որպես առաջին քայլ, կպահանջենք զենքի արգելքի կիրառում և Անկարայի դեմ պատժամիջոցներ կիրառում:

Մենք կոչ ենք անում դաշնային կառավարությանը` նպաստել, որպեսզի Լեռնային Ղարաբաղում մարդիկ կարողանան ապրել անկախ, խաղաղության և ազատության մեջ: Անհրաժեշտ է կանխել հերթական անարդարությունը` 1915 թվականին թուրքերի կողմից իրականացված ցեղասպանության ֆոնին», - ասվում է գերմանական կուսակցության բանաձևում։