Բաքվի դատարանում այսօր վատացել է Ռուբեն Վարդանյանի ինքնազգացողությունը. որպես պատճառ նշվում է՝ հացադուլը

Բաքվի դատարանում այսօր վատացել է Ռուբեն Վարդանյանի ինքնազգացողությունը, որը փետրվարի 18-ից գտնվում է հացադուլի մեջ։

Արցախի Հանրապետության նախկին պետնախարար, բարերար Ռուբեն Վարդանյանն այդ ճարահատյալ քայլին դիմել է՝ ի նշան բողոքի Բաքվի դատարանում մարդու ու դատավարական իրավունքների խախտումների դեմ։

Ադրբեջանական ԶԼՄ-ներում հրապարակվող խիստ սահմանափակ տեղեկություններից պարզ է դառնում, որ այսօր եւս Ռուբեն Վարդանյանն ու նրա փաստաբանը դատարանին ինքնաբացարկի միջնորդություն են ներկայացրել, ինչը մերժվել է՝ առանց քննարկման։

Այնուհետեւ Ռ.Վարդանյանն ընդմիջում է խնդրել՝ ինքնազգացողության վատ լինելու պատճառով, ինչից հետո նիստը շարունակվել է։

Նշվում է, որ դատախազները նրան հարցեր են ուղղել իրենց մտացածին մեղադրանքների շուրջ, որոնց Ռուբեն Վարդանյանը չի պատասխանել։

Հաջորդ նիստը տեղի կունենա մարտի 4-ին։