Ռուբեն Վարդանյանի նոր միջնորդությունը Բաքվի դատարանում. պատասխան դեռ չկա

Բաքվում այսօր շարունակվել է Արցախի նախկին պետնախարար, գործարար և բարերար Ռուբեն Վարդանյանի «դատավարությունը»:

Ինչպես հաղորդում են ադրբեջանական լրատվամիջոցները` «նիստի» ընթացքում լսվել են, այսպես կոչված, տուժողների ցուցմունքները:

Հրապարակվել են «փորձաքննությունների եզրակացությունները», «արձանագրություններ» և այլ «փաստաթղթեր», որոնք, ադրբեջանական կողմի պնդմամբ, «ապացուցողական արժեք» ունեն։

Այնուհետև, նախագահող դատավոր Զեյնալ Աղաևը հայտնել է, որ «տուժողների» հայտարարությունների հետաքննությունն այսքանով ավարտվել է։

Վարդանյանը միջնորդել է ծանոթանալ «քրեական գործի» որոշ նյութերի և դրանից հանել մի շարք «փաստաթղթեր»:

Աղաևը պատասխանել է` երբ որոշվի, թե կոնկրետ որ «փաստաթղթերին» է Վարդանյանը ցանկանում ծանոթանալ, նրա համար կստեղծվեն համապատասխան պայմաններ:

Հաջորդ «նիստը» նշանակված Է դեկտեմբերի 12–ին: