ՀՀ-ի և ՌԴ-ի հնագետներն Երևանում հայտնաբերել են վաղ երկաթի դարի երկու դամբարան

«Էրեբունի» պատմահնագիտական ​​արգելոց-թանգարանի և պետական ​​Էրմիտաժի համատեղ հնագիտական ​​արշավախումբը Երևանում Կարմիր բլուր հուշարձանի տարածքում հայտնաբերել է վաղ երկաթի դարի երկու դամբարան։ Այս մասին ТАСС-ին հայտնել է արշավախմբի ղեկավարներից, հնագետ-ուրարտոլոգ Միքայել Բադալյանը։

«Հայ-ռուսական արշավախմբի կողմից ընթացող պեղումների արդյունքում արդեն հայտնաբերվել են երկու դամբարաններ, որոնք մոտավորապես թվագրվում են մ.թ.ա. 12-9-րդ դարերի։ Կարմիր բլուրի համար այս դամբարանները նոր երևույթ են։  Թաղումներն ունեն այսպես կոչված կրոմլեխ, որը բաղկացած է «կախարդական շրջան» կազմող ուղղահայաց տեղադրված սալերից։ Թաղումն ինքնին ծածկված է քարե սալերով։ Այս կառույցի վերևում կար քարերից պատրաստված պատյան։ Նշենք, որ նման դամբարաններ առաջին անգամ են հայտնաբերվել Կարմիր բլուրում։ Սա նոր էջ է Կարմիր բլուրի պատմության, նրա թաղման ծեսի ուսումնասիրության մեջ», - հայտնել է գիտնականը:

Նա նաև ասել է, որ հաջորդ շաբաթ հայ-ռուսական արշավախումբը կհեռացնի դամաբարանի ծածկող քարե սալերը, և «պարզ կդառնա, թե ինչ կարևոր արտեֆակտ է այն թաքցնում»։

«Էրեբունի» պատմահնագիտական ​​արգելոց-թանգարանի և պետական ​​Էրմիտաժի հայ-ռուսական համատեղ հնագիտական ​​արշավախումբը սեպտեմբերի 7-ին սկսել է աշխատանքները։ Հայկական կողմից արշավախումբը ղեկավարում է Միքայել Բադալյանը, ռուսական կողմից՝ Էրմիտաժի տնօրենի օգնական Յուլիա Մարչենկոն։