Մեկ ամիս ագրարային համալսարանի ղեկավարությունը չի արձագանքում կոլեկտիվի պահանջին

Ագրարային ամալսարանի աշխատակիցներ Դանիել Պետրոսյանը, Գվիդոն Մատինյանը և Պարույր Էֆենդյանը օգոստոսի 16-ին դիմել էին ռեկտորի պարտականությունները կատարող Հրաչյա Զաքոյանին անհապաղ ռեկտորատի և գիտական խորհրդի համատեղ ընդլայնված նիստ հրավիրելու պահանջով:

Ներկայացնում ենք դիմումի բովանդակությունը.

«Հայաստանի ազգային ագրարային համալսարանի երկրորդ մասնաշենքը Հայաստանում ֆրանսիական համալսարանին հանձնելու գործընթացի դեմ համալսարանի մի խումբ աշխատակիցների կողմից նախաձեռնված հայտարարությանը միացել են բազմաթիվ աշխատակիցներ, ուսանողներ, շրջանավարտներ և պարզապես մտահոգ մարդիկ:

Քանի որ համալսարանի ներկա ղեկավարության կողմից այս հարցի կապակցությամբ չի տրվել որևէ հոդաբաշխ բացատրություն, հայտարարությանը միացած անձանց անունից Ձեզանից՝ ի պաշտոնե որպես համալսարանի կենսական շահերը պաշտպանող և ներկայացնող անձի պահանջում ենք՝

1. Անկախ արձակուրդային շրջանից, անհապաղ հրավիրել ռեկտորատի և գիտական խորհրդի համատեղ ընդլայնված նիստ,

2. Հանդես գալ հարցի վերաբերյալ կոլեկտիվին հստակ և բաց տեղեկատվության տրամադրմամբ և ներկայացնել հիմնավոր բացատրություններ,

3. Ընդունել ռեկտորատի և գիտական խորհրդի համատեղ ընդլայնված նիստի՝ համալսարանից որևէ տարածքի հանձնման բացառող և դատապարտող որոշում,

4. Ռեկտորատի և գիտական խորհրդի անունից դիմել հոգաբարձուների խորհրդին սույն հարցը խորհրդի նիստում քննարկելու համար»:

Դիմումը ներկայացնելուց անցել է ուղիղ 1 ամիս, սակայն Հ. Զաքոյանի կողմից ոչ մի արձագանք չկա: