Իրաքում եզդիների նկատմամբ գեներացվում է ատելության խոսք․ մտավախություն կա, որ իսլամիստները նորից հարձակում կգործեն․ Համլետ Սմոյան

Հայաստանում բնակվող եզիդները ՄԱԿ-ի և միջազգային հանրության ուշադրությունը հրավիրում են Իրաքում եզդիների շուրջ ստեղծված ճգնաժամային իրավիճակի վրա։
 

«Սինջար եզդիների ազգային միավորում» հասարակական կազմակերպությունից Համլետ Սմոյանը հենց ՄԱԿ-ի Երևանյան գրասենյակի դիմաց հրավիրված ասուլիսում ասաց, որ վերջին մի քանի օրերին Իրաքում եզդի ժողովրդի նկատմամբ գեներացվում է ատելության մեծ խոսք և եզդիական փախստականների ճամբարում խուճապային տրամադրություններ են. մտավախություն ունեն, որ իսլամիստները նորից հարձակում կգործեն իրենց վրա։

«Ստեղծված իրավիճակի պատճառն այն է, որ եզդիների ցեղասպանության 10-ամյակի կապակցությամբ եզդիական ջոկատի հրամանատարներից մեկն ասել էր՝ քանի Մուհամեդը կա, ապա մեր ազգի գլխին կոտորածներն անպակաս են լինելու։ Նա նկատի է ունեցել այն, որ մինչ այժմ ահաբեկիչները երբ  կոտորում են եզդիներին, ցեղասպանություն են գործում եզդիների  նկատմամբ, անում են Ալահի և Մուհամեդի անվան ներքո։ Սակայն դեպքերն այնպես զարգացան, որ  շիա և սունի հոգևորականներն իրենց քարոզչության ընթացքում կոչ արեցին, որ պետք է ոչնչացնել եզդի ժողովրդին, քանի որ եզդիականությունը դեմ է իսլամին։ Այդ ամենը մեծ ալիք ստացավ, սոցիալական ցանցերում տարբեր հեղինակավոր մարդիկ կոչ էին անում ոչնչացնել եզդիներին»,- մանրամասնեց Համլետ Սմոյանը։
 

Նա նշեց, որ ՄԱԿ-ի գլխավոր քարտողարին նամակ են ուզում հանձնել, որպեսզի ստեղծեն մեխանիզմեր և ատելութան խոսքը գործողությունների չվերածվի, միջազգային հանրությունը անտարբեր չմնա ստեղծված իրավիճակի նկատմամբ։
 

«Չգիտեմ՝  ինչ արձագանք կլինի։ Տեսել ենք, որ միջազգային հանրությունը չարձագանքեց նաև Արցախի՝ 9 ամիս շրջափակմանը։ Մեծ հույսեր չկան, բայց պետք է պահանջել, ինչքան էլ մեծ հույսեր չլինեն»,- ասաց  Համլետ Սմոյանը։