Եգիպտոսը, ԱՄՆ-ն և Իսրայելը հաջորդ շաբաթ Կահիրեում խորհրդակցություններ կանցկացնեն Գազայի հարցով

Գազայի հատվածում կարգավորման շուրջ խորհրդակցությունները Եգիպտոսի, ԱՄՆ-ի և Իսրայելի ներկայացուցիչների միջև կանցկացվեն հաջորդ շաբաթ Կահիրեում։ Այս մասին հայտնում է Al-Qahira Al-Ikhbariya հեռուստաալիքը։

Ինչպես նշել է Եգիպտոսի կառավարության բարձրաստիճան աղբյուրը, «Եգիպտոսը կհյուրընկալի իսրայելական և ամերիկյան պատվիրակություններին՝ քննարկելու Գազայի հատվածում հրադադարի համաձայնագրի հետ կապված չլուծված հարցերը»: Աղբյուրը հավելում է, որ եգիպտական ​​կողմը նաև կշարունակի խորհրդակցությունները պաղեստինյան ՀԱՄԱՍ շարժման ներկայացուցիչների հետ «իսրայելական բանտերում գտնվող պաղեստինցիների դիմաց պատանդների փոխանակման և զինադադարի շուրջ պայմանավորվածություններ ձեռք բերելու Կահիրեի ջանքերի շրջանակում»։

Գազայում հակամարտող կողմերի միջև խորհրդակցությունների և անուղղակի բանակցությունների նոր փուլը վերսկսելու հնարավորությունը ծագեց մայիսի վերջին ԱՄՆ նախագահ Ջո Բայդենի ներկայացրած առաջարկին ՀԱՄԱՍ-ի վերջին արձագանքից հետո։ Հուլիսի 3-ին Իսրայելի վարչապետ Բենիամին Նաթանյահուի գրասենյակը հայտարարեց, որ միջնորդների միջոցով ստացել է ՀԱՄԱՍ-ի ներկայացուցիչների պատասխանը պատանդների գործարքի վերաբերյալ և պատրաստվում է Իսրայելի պատասխանը դրան։ Հաջորդ օրը ՀԱՄԱՍ-ը հայտարարեց, որ իր քաղբյուրոյի ղեկավար Իսմայիլ Հանիեն խորհրդակցություններ է անցկացնում Եգիպտոսի, Քաթարի և Թուրքիայի հետ Գազայում իրավիճակի կարգավորման տարբերակների շուրջ։ Եգիպտոսն ու Քաթարը միջնորդներ են Իսրայելի հետ բանակցություններում։