300 բեռնատար հետ է վերադառնում Վերին Լարսից. ՌԴ-ն արգելում է մուտք գործել

Yerkir.am-ի տեղեկություններով՝ այս պահին Վերին Լարսում կանգնած հազարավոր բեռնատարներից (ըստ լուրերի՝ շուրջ 1700) մոտ 300-ը՝ բարձված գյուղմթերքով և այնպիսի այլ ապրանքներով, որոնք ՌԴ-ն արգելում է ներմուծել, այս ժամերին պատրաստվում են հետ վերադառնալ:

Ավելի վաղ հայտնել էինք, որ Վերին Լարսից այս օրերին համատարած հետ են վերադարձվում այն բեռնատարները, որոնց բարձված ապրանքներն ունեն ֆիտոսանիտարական սերտիֆիկատ: Դրանք են՝ ձուկը, լոլիկը, ծաղիկները, հավանաբար նաև՝ պանիրը և այլն։

Ի պատասխան այս աղետալի գործընթացի՝ ՀՀ վարչապետի աշխատակազմի ղեկավար Արայիկ Հարությունյանը, լուծումներ գտնելու փոխարեն, ՀՀ-ում և արտերկրում ապրող հայերին կոչ էր արել գնել հայկական արտադրության ապրանք և այդպիսով «սպառել» այն: Արայիկ Հարությունյանի այս անմիտ և զավեշտալի հայտարարությունը մեծ արձագանք գտավ հանրության շրջանում՝ արժանանալով սուր քննադատության ու ծաղրանքի:

Ըստ ՀՅԴ անդամ, ԱԺ «Հայաստան» խմբակցության պատգամավոր Թադևոս Ավետիսյանի՝ ՀՀ արտահանման 52 տոկոսը գնում է ՌԴ, և այն ապրանքը, որ Ռուսաստան է գնում, ոչ միայն Եվրոպական շուկաներում մրցունակ չի լինի, այլ չեն էլ թողնի, որ գնա այդ շուկա:

Էքսպորտի կենտրոնի տնօրեն, արտահանման ոլորտում մասնագիտացած Ռուզաննա Մալխասյանն էլ անդրադարձել էր ՀՀ-ից դեպի ՌԴ արտահանման շուրջ առաջացած ճգնաժամին, իշխանությունների կողմից առաջարկվող այլընտրանքներին, բերել մի շարք վիճակագրական փաստեր, դրանց հենքի վրա կատարել դիտարկումներ ու եզրահանգումներ, ըստ որոնց՝ այսօր հայտարարել, թե ՌԴ-ի փոխարեն հնարավոր է գտնել արտահանման այլ երկրներ, բացարձակ նոր տեսություն է, որն ստեղծվել է էկոնոմիկայի հետ ոչ մի աղերս չունեցող մարդկանց կողմից՝ ժողովրդին մանիպուլացնելու համար։