Քարաշենում և այլուր սպասում են Փաշինյանի խոստացածին

Տեղ համայնքի Քարաշեն բնակավայր կատարած այցի ժամանակ Նիկոլ Փաշինյանը  ծանոթացավ սահմանամերձ բնակավայրերում Կառավարության կողմից տրամադրվող 16 մլն դրամի շրջանակում բնակարանների կառուցման ծրագրին՝  հայտարարելով, որ Կառավարության առաջիկա նիստում քննարկվելու է շահառուների կողմից բարձրաձայնված խնդիրները: Խոսքը, մասնավորապես,  վերաբերում է բանկերի կողմից 16 մլն դրամի դիմաց շուրջ 25 մլն դրամի չափով գրավի պահանջին: Սա առաջացնում է դժվարություն,  քանի որ շատ շահառուներ չունեն այդքան արժողության սեփականություն, չեն կարող բավարարել գրավադրման պահանջները, ինչի արդյունքում չեն կարող օգտվել ծրագրից: 

Կառավարության հաջորդ նիստում, հակառակ Փաշինյանի խոստման, հրապարակային անդրադարձ չեղավ նշված խնդրին: Նախընտրական շրջանում և բազմաթիվ այլևայլ խոստումներ շաղ տված, այնուհետև դրանք մոռացած կամ դրժած ու չկատարած Նիկոլ Փաշինյանի համար հավանաբար սովորական բան է դարձել դա: Այդուհանդերձ, մենք Կառավարությանը գրավոր հարցում ենք ուղղել և շուտով կպարզենք՝ ինչու՞ Կառավարության հաջորդ նիստում չքննարկվեց նշված հարցը,  լուծվե՞լ է, արդյոք, շահառուների բարձրաձայնած խնդիրը, դժվարություն, որը Քարաշեն բնակավայրում խոստացավ լուծել Նիկոլ Փաշինյանը: