կարևոր
2233 դիտում, 11 ամիս առաջ - 2023-06-30 15:35
Աշխարհ

Համաշխարհային բանկը հաստատել է 1,5 միլիարդ դոլարի վարկն Ուկրաինային` Ճապոնիայի երաշխավորությամբ

Համաշխարհային բանկը հաստատել է 1,5 միլիարդ դոլարի վարկն Ուկրաինային` Ճապոնիայի երաշխավորությամբ

Համաշխարհային բանկի գործադիր տնօրենների խորհուրդը հավանություն է տվել Ուկրաինային 1,5 միլիարդ դոլարի չափով վարկի հատկացմանը՝ վերականգնողական գործունեության համար: Այդ մասին «Արմենպրես»-ը տեղեկանում է «Интерфакс» գործակալությունից:

Ըստ բանկի մամուլի տեղեկագրի՝ ֆինանսավորումը կօգնի բավարարել «նոր չունևոր և տեղահանված անձանց» տնային տնտեսությունների կարիքները, կաջակցի բարեփոխումների իրականացմանը՝ ուղղված պետական ռեսուրսների ծախսերի թափանցիկության ու հաշվետվողականության բարձրացմանը, ինչպես նաև կնպաստի շուկայական գործունեությանը:

Որպես երաշխավոր հանդես է եկել Ճապոնիայի կառավարությունը։

«Վարկն Ուկրաինայի միջազգային աջակցության փաթեթի անբաժանելի մասն է՝ 2023 թ.-ի նրա ֆինանսավորման կարիքները բավարարելու համար», - նշել է բանկը:

Իր հերթին, Ուկրաինայի ֆինանսների նախարարությունը հաղորդել է, որ հունիսի 29-ին երկրի պետական ​​բյուջեն ստացել է 1,215 միլիարդ դոլարի չափով դրամաշնորհային ֆինանսավորում` Համաշխարհային բանկի բազմաթիվ դոնորների Նպատակային հիմնադրամի միջոցով, այդ թվում՝ 1,2 միլիարդ դոլար՝ ԱՄՆ-ից և 15 միլիոն դոլար՝ Ֆինլանդիայից:

Ստացված միջոցներն ուղղվելու են պետական ​​մարմինների աշխատողների և մանկավարժների աշխատավարձերի վճարմանը, կենսաթոշակային վճարումներին, ինչպես նաև պետական ​​սոցիալական օգնության որոշակի ծրագրերի վճարումներին։