Բայդենը հայտնել է, որ ԱՄՆ-ը «պատմական»՝ 13,6 միլիարդ դոլարի օգնություն կտրամադրի Ուկրաինային

ԱՄՆ նախագահ Ջո Բայդենը ստորագրել է օրենք, որով Ուկրաինային տրամադրում է 13,6 միլիարդ դոլարի ռազմական, հումանիտար և տնտեսական օգնություն։

«Ես հենց նոր ստորագրեցի օրենքը երկկուսակցական պետական ֆինանսավորման մասին, որով Ուկրաինային տրամադրվում է պատմական՝ 13,6 միլիարդ դոլարի ֆինանսավորում», - ասել է Բայդենը:

Նրա խոսքով՝ այս օրինագծով Սպիտակ տունը պատրաստվում է ամերիկացի ժողովրդին ուղարկել «ուժեղ ազդանշան, որ դեմոկրատներն ու հանրապետականներն իսկապես կարող են համախմբվել ու ինչ-որ բան անել»։

ԱՄն նախագահը հավելել է, որ ռուսական ներխուժումը միավորել է մարդկանց ամբողջ Ամերիկայում։ «Միավորվել են մեր երկու կուսակցությունները Կոնգրեսում, և միավորվել է ազատասեր աշխարհը հրատապ և վճռական գործելու համար, ինչը մենք անում ենք հենց հիմա»,- նշել է նա։

Միջոցները նախատեսված են Ուկրաինայի զինված ուժերին աջակցելու համար, գումարի մի մասն ուղղվելու է նաև քաղաքացիներին, այդ թվում՝ մոտ 1,5 միլիոն փախստականների մարդասիրական օգնությանը։

ԱՄՆ Կոնգրեսի Ներկայացուցիչների պալատի խոսնակ Նենսի Փելոսին մարտի 9-ին օրինագծի քվեարկության ժամանակ նշել է, որ հատկացված գումարը, ամենայն հավանականությամբ, կլինի միայն «այսբերգի գագաթը»։