կարևոր
2830 դիտում, 11 ամիս առաջ - 2023-04-10 20:25
Հասարակություն

Ի տարբերություն իշխանական պատգամավորների՝ ակնհայտ խտրական վերաբերմունք կա ընդդիմության ներկայացուցչի նկատմամբ. փաստաբան

Ի տարբերություն իշխանական պատգամավորների՝ ակնհայտ խտրական վերաբերմունք կա ընդդիմության ներկայացուցչի նկատմամբ. փաստաբան

Որպես իրավաբան՝ ինձ համար զուտ վիրավորական է, որ փորձ է արվում տեղի ունեցածը որակել որպես խուլիգանություն։ Սա ուղղակի ծաղր է իրավաբանության նկատմամբ,  Azg.am-ի թղթակցի հետ զրույցում ասաց փաստաբան Երվանդ Վարոսյանը՝ անդրադառնալով գլխավոր դատախազի՝  պատգամավոր Մհեր Սահակյանի նկատմամբ Ազգային ժողով քրեական հետապնդում միջնորդությամբ միջնորդագիր ներկայացնելու փաստին։

«Ինչ վերաբերում է մյուս առումով հետապնդմանը՝ տեղի է ունեցել հարված, կա հետևանք։ Խնդիրն այստեղ նրանում է, որ այս գումարման Ազգային ժողովում մենք բազմաթիվ հարվածներ արդեն տեսել ենք և տեսել ենք, որ դրանք անհետևանք են մնացել՝ դրանց փաստով անգամ քննություն չի իրականացվել, որևէ անձի նկատմամբ քրեական հետապնդում չի հարուցվել»,- ընդգծեց մեր զրուցակիցը։

Ըստ Երվանդ Վարոսյանի՝ սա ինքնին խոսում է այն մասին, որ ի տարբերություն իշխանական պատգամավորների՝ ակնհայտ խտրական վերաբերմունք կա ընդդիմության ներկայացուցչի նկատմամբ։

«Սա աղաղակող ապօրինություն է, սա իրավունքի ոտնահարում է»,- ասաց փաստաբանը։

Հիշեցնենք, որ ՀՀ գլխավոր դատախազ Աննա Վարդապետյանն ԱԺ «Հայաստան» խմբակցության պատգամավոր Մհեր Սահակյանի նկատմամբ հանրային քրեական հետապնդում հարուցելուն համաձայնություն տալու մասին միջնորդագիր է ներկայացրել ՀՀ Ազգային ժողով։

Հիշեցնենք նաև՝ ԱԺ պետաիրավական մշտական հանձնաժողովի փակ նիստում օրերս միջադեպ էր տեղի ունեցել։

Հանձնաժողովի նախագահ, «Քաղաքացիական պայմանագիր» խմբակցության պատգամավոր Վլադիմիր Վարդանյանի և «Հայաստան» խմբակցության պատգամավոր Մհեր Սահակյանի միջև ծեծկռտուք էր գրանցվել։

Մհեր Սահակյանին տարել էին ոստիկանություն, այնուհետ՝ ձերբակալել, իսկ ահա Վլադիմիր Վարդանյանին տեղափոխել էին հիվանդանոց, իսկ ավելի ուշ՝  դուրս գրել։

Ապրիլի 3-ին Մհեր Սահակյանն ազատ էր արձակվել։ Նա ասել էր, թե Վլադիմիր Վարդանյանը հանձնաժողովի նիստում դրսևորել է ագրեսիվ վարքագիծ, «բռի կերպով»չարաշահել է իր լիազորությունները։

Աղբյուրը՝ Azg.am