Մեծ Բրիտանիան վերացնում է Թուրքիայի պաշտպանական արտադրանքի արտահանման բոլոր սահմանափակումները

Մեծ Բրիտանիան ամբողջությամբ հանել է Թուրքիայի պաշտպանական արտադրանքի արտահանման բոլոր սահմանափակումները, որոնք սահմանվել էին 2019 թվականին Սիրիայի հյուսիսում այդ երկրի ռազմական գործողությունից հետո. ուրբաթ հայտարարել է Թուրքիայի պաշտպանական արտադրության վարչության ղեկավար Իսմայիլ Դեմիրը։

Դեկտեմբերի սկզբին բրիտանական կառավարությունը հայտարարեց, որ կվերսկսի արտահանումը Թուրքիա, սակայն ավելացրել է, որ մտադիր է ուշադիր դիտարկել արտահանման նոր լիցենզիաները՝ յուրաքանչյուր դեպքի համար։

«Չնայած դեկտեմբերյան հայտարարությանը՝ կան պաշտպանական ապրանքների արտահանման լիցենզիաներ, որոնք սպասում են Մեծ Բրիտանիայի կառավարության հաստատմանը, և սահմանափակումները գործնականում մնում են ուժի մեջ»,- Իսմայիլ Դեմիրի խոսքերն է մեջբերում HaberTürk-ը։

«Ուրբաթ օրվա դրությամբ բոլոր սահմանափակումները հանվել են, և լիցենզիայի բոլոր հարցումները հաստատվել են»,- ասել է Դեմիրը:

Միացյալ Թագավորությունը 2019 թվականի հոկտեմբերին կասեցրել է Թուրքիային զենքի արտահանման լիցենզիաների տրամադրումը, որը կարող էր օգտագործվել Սիրիայում քրդական ուժերի դեմ ռազմական գործողությունների ժամանակ։