Բրիտանիան ակնկալում է, որ Թուրքիան հետագայում կհրաժարվի պաշտպանական արդյունաբերության ոլորտում Ռուսաստանի հետ համագործակցությունից

Մեծ Բրիտանիան ակնկալում է, որ Թուրքիան ապագայում պաշտպանական արդյունաբերության ոլորտում համագործակցությունը կշարունակի ոչ թե Ռուսաստանի, այլ ՆԱՏՕ-ի դաշնակիցների հետ: Այս մասին հինգշաբթի հայտարարել է Անկարայում Մեծ Բրիտանիայի դեսպան Դոմինիկ Չիլքոթը:

«Մեր դիրքորոշումը միանգամայն պարզ է՝ մենք հույս ունենք, որ ապագայում Թուրքիան կբավարարի իր պաշտպանական արդյունաբերության կարիքները ոչ թե Ռուսաստանի, այլ ՆԱՏՕ-ի դաշնակիցների օգնությամբ»,- դիվանագետի խոսքերը մեջբերում է թուրքական Hurriyet Daily News թերթը:

Չիլքոթը հավելել է, որ «Մեծ Բրիտանիան պարտավորվում է աշխատել Թուրքիայի հետ պաշտպանական ոլորտում», մասնավորապես՝ կործանիչների արտադրության:

Միևնույն ժամանակ, բրիտանացի դիվանագետն ասել է, որ Լոնդոնը հավատարիմ է ՆԱՏՕ-ի դոկտրինին`կապված Ռուսաստանից տեխնիկա գնելու հետ: «Մենք հավատարիմ ենք ՆԱՏՕ-ի դիրքորոշմանը, որ դաշնակիցները չպետք է տեխնիկա գնեն Ռուսաստանից»,- նշել է նա:

Ըստ դեսպանի՝ կան «որոշ բացառություններ այն երկրների համար, որոնք Ռուսաստանից ժառանգություն են ստացել տեխնիկա՝ Սառը պատերազմի ժամանակներից»: