ԱՄՆ հետախուզությունն օգնում է Կիևին՝ պարզել Ուկրաինայում ռուսաստանցի գեներալների տեղը

ԱՄՆ-ն Ուկրաինայի զինված ուժերին տրամադրել է հետախուզական տվյալներ, որոնք նրանք օգտագործել են ՌԴ ԶՈւ բարձրաստիճան սպաներին ոչնչացնելու համար. գրում է New York Times-ը՝ հղում անելով ԱՄՆ վարչակազմի պաշտոնյաներին։

Ուկրաինայի տվյալներով՝ պատերազմի սկզբից ի վեր ռազմաճակատում զոհվել է 12 բարձրաստիճան ռուս սպա։ Նշվում է, որ այս թիվը զարմացրել է ռազմական վերլուծաբաններին։

Ռուսաստանը պաշտոնապես հաստատել է երկու փոխհրամանատարների՝ գեներալ-մայոր Անդրեյ Սուխովեցկու և գեներալ-մայոր Վլադիմիր Ֆրոլովի մահը։

Ըստ պարբերականի աղբյուրների՝ ուկրաինացի պաշտոնյաները միավորել են ԱՄՆ-ից ստացված՝ ռուս սպաների գտնվելու վայրի տեղեկատվությունը և սեփական տվյալները՝  նրանց մահվան պատճառ դարձած հարվածներն իրականացնելու համար։

NYT-ը նշում է, որ ռուսական զորքերի գտնվելու վայրի մասին տեղեկատվության աղբյուրներից են գաղտնի և առևտրային արբանյակային պատկերները։

Նշվում է նաև, որ Վաշինգտոնը հրաժարվել է տրամադրել ռուսական զորքերի բարձրագույն հրամկազմի տվյալները: