Մեր հետախուզությունն ամեն ինչ տեսնում, լսում է. Արծրուն Հովհաննիսյան

Երեկ ԼՂՀ ՊԲ-ն հայտարարեց, որ նկատվում է հակառակորդի զորքերի տեղաշարժ: Այսօր ՀՀ պաշտպանության նախարարի մամուլի խոսնակ Արծրուն Հովհաննիսյանը լրագրողներին ասաց, որ այս տեղաշարժը նախորդ իրավիճակին նման չէ` ավելի մեծ զորախմբերի մասին է խոսքը:

«Մեր հետախուզությունն ամեն ինչ տեսնում, լսում է, բայց թե ինչքա՞ն զորք է տեղակայված, չեմ կարող ասել, գաղտնիք է: Հետախուզությանը կարելի է ինչ-որ առումով մեղադրել այս կամ այն հարցում, բայց հերիք է շեշտադրենք, թե նրանք թերացել են իրենց գործում: Քառօրյա մարտական գործողությունների ժամանակ կանխարգելիչ այնպիսի հարվածներ են հասցվել, որ հակառակ դեպքում ամեն ինչ նման ելք չէր ունենա, և դա` հենց հետախուզության շնորհիվ»,- ասաց նա:

Ինչ վերաբերում է հարցին, թե ճի՞շտ է լուրը, որ երեկ Ադրբեջանում պարգևատրվել է զինվորականը, ով գլխատել էր շարքային Քյարամ Սլոյանին, Հովհաննիսյանը պատասխանեց, որ նախնական տվյալներով` այո, նա է, բայց իրենք դեռ ճշտում են լուրի իսկությունը: «Խնդրի հետ կապված` մենք արդեն բարձրաձայնել ենք համապատասխան մարմիններին, իսկ իրավական մասով նյութեր են հավաքվում»,- ասաց նա: