Քոչար-Վաղարշյան խաչմերուկում ոստիկանները մայթից բերման ենթարկեցին ցուցարարներին, որոնք արդեն բացել էին փողոցը

Այսօր՝ մայիսի 5-ի առավոտից, կրկին Երեւանում սկսվել են անհնազանդության ակցիաները. քաղաքացիները դարձյալ կաթվածահար են արել մայրաքաղաքի մի շարք փողոցներ: Մասնավորապես՝ փակ են փողոցներ Դավիթաշենում, Քոչար-Վաղարշյան փողոցների խաչմերուկը:

Բանավեճ ծավալվեց ակցիայի մասնակիցների եւ վարորդների միջեւ, որոնք պահանջում էին բացել ճանապարհը: «Էդ 5 րոպեով, որ փողոցը փակեցիք, դրանից հետո 5 ժամ խցանման մեջ մենք ոնց ենք անցնելու»,-ասաց վարորդներից մեկը: Ակցիայի մասնակիցներից մեկն էլ պատասխանեց, որ հիմա փակում են, որ վաղն էլ քաղաքացիները գնալու տեղ ունենան, հայրենիք ունենան:

Ակցիայի մասնակիցները սկսեցին վանկարկել՝ «հայեր, միացեք»:

Վարորդներից մեկը նկարում էր ակցիայի մասնակիցներին, ինչին ցուցարարներից մեկն արձագանքեց. «Նկարի-նկարի, Նիկոլի նման մարդասպան»:

Քիչ անց ոստիկանները Քոչար-Վաղարշյան խաչմերուկից սկսեցին բերման ենթարկել ցուցարարներին, ընդ որում՝  ակցիայի մասնակիցներն արդեն բացել էին փողոցը եւ նրանց բերման ենթարկեցին մայթից:

Դրանից քիչ հետո դեռեւս այդտեղ գտնվող ցուցարարները աղբամաններով փակեցին փողոցը: Կրկին ժամանեցին ոստիկանները եւ 5 րոպե ժամանակ տվեցին ճանապարհը բացելու համար: Իրավապահները դուրս բերեցին աղբամանները ճանապարհից եւ վերականգնեցին երթեւեկությունը: