Ուկրաինայում պատերազմը կարող է տևել հինգ տարի կամ նույնիսկ մեկ տասնամյակ. Մեծ Բրիտանիայի արտգործնախարար

Ռուսաստանի դեմ պատերազմի ժամանակ Ուկրաինան առաջին հերթին պետք է ազատի սեփական տարածքները Ղրիմում և Դոնբասում, իսկ Արևմուտքը կօգնի զենքով և Ռուսաստանի Դաշնության դեմ պատժամիջոցներով։ Այս մասին հայտարարել է Մեծ Բրիտանիայի արտաքին գործերի նախարարության ղեկավար Լիզ Թրասը. գրում է The Times-ը։

Դիվանագետն ասել է, որ եթե ռուս «բռնապետ» Պուտինին հաջողվի հասնել տարածքային նոր ձեռքբերումների, նա «անհաշվելի նոր տառապանքներ կպատճառի ողջ Եվրոպային»։

«Սա համապարփակ պատերազմ է, քանի որ Ուկրաինայի հաղթանակը ռազմավարական հրամայական է բոլորիս համար»,- ասել է Թրասը։

Զենքի մատակարարման վերաբերյալ նախարար Թրասն ասել է, որ իրենք պետք է ավելի խորը նայեն բրիտանական պաշարներին, «մենք պետք է մեծացնենք արտադրությունը», որպեսզի Ուկրաինան արագ ստանա անհրաժեշտ ծանր սպառազինությունը, տանկերն ու ինքնաթիռները:

Միևնույն ժամանակ, նախարարը խոստովանել է, որ Ուկրաինայում պատերազմը կարող է տևել «մինչև հինգ տարի կամ նույնիսկ մինչև մեկ տասնամյակ», և Պուտինը կարող է զանգվածային ոչնչացման զենք կիրառել՝ հուսահատորեն փորձելով դուրս բերել ՌԴ-ն  փակուղուց։

Նախարարը նաև նշել է, որ անհրաժեշտ է Պուտինին զրկել Ուկրաինայում իր հաղթանակը հայտարարելու հնարավորությունից: