Երեք տասնամյակ անց Գյումրին այդպես էլ չի վերականգնվել՝ հակառակ այս տարիների ընթացքում իշխանությունների տված խոստումներին․ Մհեր Մելքոնյան

ՀՅԴ Շիրակի Մարզային կոմիտեի ներկայացուցիչ, ԱԺ «Հայաստան» խմբակցության պատգամավոր Մհեր Մելքոնյանը գրում է.

««Քանի որ վաղը դեկտեմբերի 7-ն է՝ 1988թ. աղետալի երկրաշարժի տարելիցը, ուզում եմ ասել, որ աղետի գոտու առումով էլ 2020թ. բյուջեն հեղափոխական է, որովհետև մյուս տարվա բյուջեով աննախադեպ մեծ թիվ է տրամադրվել աղետի գոտու խնդիրներին՝ 3 մլրդ դրամ: Տեսանելի ժամանակաշրջանում երբեք այսպիսի ծավալների, նույնիսկ դրան մոտիկ գումար չի տրամադրվել: Սրանով, ուզում եմ արձանագրել, որ մենք 2020թ. լուծում ենք բոլոր այն քաղաքացիների հարցերը, ում նկատմամբ ՀՀ ունեցած պարտավորությունը դե յուրե արձանագրված է: Սա նշանակում է, որ աղետի գոտու վերականգնման պրոցեսում նոր փուլ է սկսվում և որը պետք է իրագործվի բոլորովին ուրիշ տրամաբանությամբ: Եվ այդ փուլի իմաստը, այսպես ասած, սոցիալական արտակարգ իրավիճակի տրամաբանությունը վերափոխելն է զարգացման տրամաբանությամբ»․ Նիկոլ Փաշինյանի եզրափակիչ ելույթը 2020թ. պետական բյուջեի քննարկմանը։

Ավերիչ երկրաշարժից անցել է 36 տարի։

Տեղի ունեցած աղետից երեք տասնամյակ անց, պետք է արձանագրենք՝ Գյումրին այդպես էլ չի վերականգնվել՝ հակառակ այս տարիների ընթացքում իշխանությունների տված խոստումներին: Այդ ամենի վառ ապացույցը Գյումրիում առկա տնակային ավաններն են և քաղաքի տարբեր մասերում երկրաշարժից կիսավեր մնացած շենքերը։

Ի հեճուկս «հեղափոխական» խոստումների Գյումրիում դեռևս անօթևան ընտանիքներ կան:

Գործող ապազգային իշխանության ներկայացուցիչներն ընտրություններին մասնակցեցին խոստումների մի ամբողջ փաթեթով՝ բաղկացած պոպուլիստական ծրագրից, հրապարակային անհեթեթ հայտարարություններից ու ելույթներից։ Այդ ամենը շատ տպավորիչ էր հնչում, բայց այնքան ժամանակ, քանի դեռ ՔՊ-ական խմբակը չէր հաղթել ընտրություններում և... ոչ մի լուրջ փոփոխություն դեպի լավը և իրականությունը։

Սուտ, հակապետական և անիրականալի խոստումներ տալը փաշինյանական իշխանության ավանդույթների մեջ է։

Դեկտեմբերի 7-ին Ամենայն Հայոց Կաթողիկոս Գարեգին Երկրորդի ձեռամբ վերաօծվեց Գյումրու Սուրբ Ամենափրկիչ եկեղեցին։

Գյումրեցիներին փայլուն ապագա խոստացող ՔՊ-ական խմբակի ներկայացուցիչներից և ոչ մեկը չբարեհաճեց մասնակից լինել այդ կարևոր և սուրբ արարողությանը։

Երևի՞ հատուկ հրավերի էին սպասում․․․

Չնայած նրանք վաղուց են կտրվել իրականությունից և խզել կապը հասարակ ժողովրդի հետ։

Պետք է իմանալ ժողովրդի կարծիքը, հաշվի առնել այն և չփորձել չարաշահել մարդկանց համբերությունը։

Հ․Գ․ Իսկ այս ընթացքում նիկոլական իշխանությունը ներկայացնող Շիրակի մարզային և համայնքային չինովնիկները շարունակում են պետական ինստիտուտների կազմաքանդումը»։