Անընդունելի է որևէ սցենար, որի դեպքում Արցախը կարող է դիտարկվել Ադրբեջանի կազմում. Իշխան Սաղաթելյան

Հերթական հանդիպումն էր, որտեղ հայկական շահը ներկայացված չէր։ «Փաստինֆո»-ի հետ զրույցում նման հայտարարություն է արել ԱԺ փոխնախագահ, ՀՅԴ ԳՄ ներկայացուցիչ Իշխան Սաղաթելյանը՝ անդրադառնալով երեկ կայացած Նիկոլ Փաշինյան-Ալիև-Շառլ Միշել բրյուսելյան բանակցություններին:

4,5 ժամ տեւած բանակցությունների արդյունքներով ձեռք է բերվել պայմանավորվածություն` մինչև ապրիլի վերջ ստեղծել Հայաստանի և Ադրբեջանի միջև սահմանների դելիմիտացիայի հարցերով երկկողմ հանձնաժողով, որը օժտված կլինի նաև սահմանի երկայնքով անվտանգություն և կայունություն ապահովելու հարցերով:Բացի այդ՝ Հայաստանի վարչապետը և Ադրբեջանի նախագահը Արտաքին գործերի նախարարներին հանձնարարել են մեկնարկել երկու երկրների միջև խաղաղության բանակցությունների նախապատրաստական աշխատանքները

Ինչ վերաբերում է սահմանագծման և սահմանազատման հարցերով հանձնախումբ ստեղծելու որոշմանը՝ Իշխան Սաղաթելյանն ընդգծեց՝սահմանագծման և սահմանազատման գործընթացը չի կարող տեղի ունենալ ուժի սպառնալիքի կիրառման պարագայում. ուստի այդպիսի գործընթացի մեկնարկի համար ադրբեջանական զորքերի դուրս բերումը ՀՀ սուվերեն տարածքից պարտադիր պայման է»,-ասաց ԱԺ փոխնախագահը:

Խոսելով խաղաղության պայմանագրի շուրջ բանակցություններ սկսելու որոշման մասին՝ Սաղաթելյանը նշեց՝ անընդունելի է որևէ սցենար, որի դեպքում Արցախը կարող է դիտարկվել Ադրբեջանի կազմում։

Աղբյուր` Փաստինֆո