ՏԵՍԱՆՅՈՒԹ․ Արցախի համար անընդունելի է Ադրբեջանի կազմում որևէ կարգավիճակ․ Դավիթ Բաբայանը՝ ՀՅԴ Հայ դատի խորհրդաժողովին

Արցախի ժողովրդի և իշխանությունների համար անընդունելի է Ադրբեջանի կազմում որևէ կարգավիճակ՝ ըստ Yerkir.am-ի ասաց Արցախի արտաքին գործերի նախարար Դավիթ Բաբայանը, որը Ստեփանակերտում մասնակցում է ՀՅԴ Հայ դատի գրասենյակների և հանձնախմբերի խորհրդաժողովին:

«Արցախի ժողովրդի և իշխանությունների համար անընդունելի է Ադրբեջանի կազմում որևէ կարգավիճակ, ինչը կնշանակի Արցախի և հայոց պետականության կործանում։ Որպեսզի ճիշտ քայլեր ձեռնարկենք, պետք է լինենք չափազանց իրատես, պրոֆեսիոնալ, և, բնական է, պետք է լինենք հայրենասեր ու լավատես։ Այո, ծանր վիրավոր է Արցախը, մենք նման ենք մի մարտիկի, որը կորցրել է մեկ ոտքը, մեկ ձեռքը, աչքը, խոցված է ամբողջ մարմինը, բայց ողջ ենք»,-ասաց Դավիթ Բաբայանը։

Նա բարձր գնահատեց ՀՅԴ Հայ Դատի գրասենյակների աշխատանքը, կառույցի ներդրումն Արցախի զարգացման և զորացման գործում։

Նշենք, որ ՀՅԴ Հայ դատի հանձնախմբերի և գրասենյակների անդամները Երևանում, Գորիսում և Ստեփանակերտում մասնակցում են 5-օրյա խորհրդաժողովի։ Հայ դատն աշխարհով մեկ առաջ տանող գործիչները խորհրդաժողովի 3 հանգրվաններում խիստ հագեցած օրակարգով զեկույցներով հանդես եկան, ներկայացրին ստեղծված մարտահրավերներին դիմակայելու իրենց առաջարկները, հանդիպեցին պետական առանցքային պաշտոնյաների հետ՝ առաջին ձեռքից տեղեկանալու խնդիրներին և հստակեցնելու իրենց անելիքը։

Աննա Բալյան

Մանրամասն՝ տեսանյութում․