ՌԴ-ի դաշնակից Էրդողանը հայտարարել է, որ եթե աշխարհն արձագանքեր ռուսների՝ «Ղրիմ ներխուժմանը», այսօր պատերազմ չէր լինի

2014 թվականին Ռուսաստանի կողմից Ղրիմի բռնակցմանը համաշխարհային հանրության անբավարար արձագանքը հանգեցրեց Ուկրաինայի դեմ Ռուսաստանի ներկայիս պատերազմին։ Այս մասին Անթալիայի դիվանագիտական ֆորումի բացման արարողության ժամանակ ասել է Թուրքիայի նախագահ Ռեջեփ Թայիփ Էրդողանը։

«Եթե ամբողջ Արևմուտքը և ամբողջ աշխարհը ձայնը հանեին 2014 թվականին Ղրիմ ներխուժման դեմ, մենք կկանգնեի՞նք այսօրվա պատկերի առաջ։ Բայց նրանք, ովքեր լռում էին Ղրիմի բռնակցման մասին, հիմա ինչ-որ բան են ասում: Արդյո՞ք արդարությունը գործում է այս աշխարհի մի մասում և անվավեր է մի այլ մասում: Սա ի՞նչ աշխարհ է: Ցավոք, միջազգային հանրությունը չի ցուցաբերել անհրաժեշտ զգայունություն և աջակցություն այս անարդարության դեմ պայքարելու համար»,- ասել է Էրդողանը։

Նրա խոսքով՝ Ուկրաինայի դեմ Ռուսաստանի ներկայիս ագրեսիայից հնարավոր կլիներ խուսափել, եթե նախկինում դիվանագիտական գործիքներն ավելի արդյունավետ օգտագործվեին։