ՀՀ դեսպանատնից ասում են` մեկը լինի մեզ օգնի, փախեք արևմուտք, այլ բան ձեզ համար չենք կարող անել. Ուկրաինայում գտնվող ՀՀ քաղաքացին ահազանգում է. tert.am

Ուկրաինայի Կիրովոգրադ քաղաքում գտնվող ՀՀ քաղաքացի Արման Կարապետյանը և իր կինը, ովքեր Ուկրաինա են մեկնել մի քանի օրով, ռազմական գործողությունները սկսելուց հետո չեն կարողանում վերադառնալ Հայաստան, իսկ Ուկրաինայում ՀՀ դեսպանատնից ստանում են անորոշ և ոչ հուսադրող պատասխաններ։ Tert.am-ի հետ զրույցում Արման Կարապետյանը նշեց, թե այն հայտարարությունները, որ ՀՀ դեսպանատունը էվակուացնում է ՀՀ քաղաքացիներին և կազմակերպում երկրից դուրս գալը, չեն համապատասխանում իրականությանը։ «Հիմա Կիրովոգրադ քաղաքում ենք գտնվում ես և կինս, հյուր ենք եկել մի քանի օրով, մնում ենք բարեկամների տանը։ Փետրվարի 25-ին տոմս ունեինք, պետք է վերադառնայինք Հայաստան։ Ամսի 23-ին գնացինք Կիև, որպեսզի 2 օր մնանք ու վերադառնանք տուն, 24-ի առավոտյան ռմբակոծության ձայներ լսեցինք։

Իմացանք, որ հնարավոր չէ տուն վերադառնալ, հետ ենք եկել Կիրովոգրադ։

Ամսի 24-ին զանգահարել եմ Կիևում գտնվող մեր դեսպանատուն։ Հարցրեցին` հիմա որտեղ եմ գտնվում, ասացի` Կիևում, պատասխանեցին` փախեք արևմտյան Ուկրաինա։

Ասացի, որ ո՛չ մեքենա ունենք, ո՛չ հնարավորություն, ո՞նց փախչենք, ինձ պատասխանեցին, որ հիմա այլ բան անել չեն կարող։ Հիմա կարդում եմ նյութերը, որ իբր դեսպանատունը օգնում է Հայաստանի քաղաքացիներին, ծիծաղս գալիս է»,- ասաց Արման Կարապետյանը։

Վերջինս նշեց որ այսօր ևս փորձել է կապվել դասպանատան հետ։

«Այսօր զանգեցի, մի աղջիկ պատասխանեց։ Ասաց այն լուրերը, թե դեսպանատունը ինչ-որ բանով օգնում է Հայաստանի քաղաքացիներին, ֆեյք է։

Ադրբեջանցիներն են երևի տարածում, թե ՀՀ քաղաքացիներին տարհանում են։ Այդ աղջիկը լացակումած պատասխանեց, թե մեկը լինի մեզ էվակուացնի, ասաց, որ տնից է ինձ հետ խոսում, իր պատուհանի տակ ռմբակոծում են ու, որ վախից չգիտի` ինչ անի։ Հիմա, եթե ես դեսպանատուն չեմ կարող դիմել, ապա ո՞ւմ վրա հույսս դնեմ»,- ասաց Արման Կարապետյանը։

Ինչ վերաբերում է ՀՀ ԱԳՆ-ի այսօր տարածած այն հայտարարությանը, որ Հայաստանի Հանրապետության քաղաքացիների համար Լեհաստանի, Սլովակիայի, Հունգարիայի, Ռումինիայի և Մոլդովայի սահմաններով վերադառնալու դեպքում նշյալ երկրների՝ նախապես ստացած վիզա չի պահանջվի, Արման Կարապետյանը պատասխանեց.

«Հիմա Լեհաստանը առանց վիզա ընդունում է, Կիրովոգրադից մինչև Լեհաստանի սահման 750 կմ է, բացի այդ պետք է գնամ ու այնտեղ 6-7 օր հերթ կանգնեմ, որ կարողանամ սահմանը հատել, պատկերացնում եք չէ՞ հիմա ինչ է այնտեղ կատարվում, մեքենա ու այլ հնարավորություն չունենք այնտեղ հասնելու համար, չգիտենք` ինչ անենք։ Այս ամենից հետո հայտարարություն են տարածում, թե ՀՀ դեսպանատունը օգնում է իր քաղաքացիներին, դեռ հայտարարության մեջ էլ գրել են, որ պատրաստ են օգնել նաև ուրիշներին, իրենք մեզ չեն կարողանում օգնել, ուր մնաց թե ուրիշներին օգնեն։

Դեսպանատնից փոխանցել են, որ ուղարկենք մեր տվյալները, բայց էդպես 700-800 հոգու տվյալ ունեն իրենց ձեռքի տակ ու ոչ մեկին չեն կարողացել օգնեն։ Ուկրաինայի հայ համայնքն էլ է նույն վիճակում, միայն իրար հետ կապ են հաստատում ու միմյանց տեղեկացնում, թե որ հատվածներում են ռազմական գործողություններ իրականցվում ու վերջ։ Կրկնում եմ դեսպանատունը բացարձակապես ոչնչով չի օգնում»,- ասաց Արման Կարապետյանը։