Երբ ՍԴ անդամը հեռուստացույցի առաջ ասում է մեկ բան, տասը րոպե հետո ասում է մեկ այլ բան, ապա ինձանից ի՞նչ եք ուզում. Հակոբ Հակոբյան

ԱԺ նիստում, երբ քննարկվում էր կուտակայինի վերաբերյալ կառավարության ներկայացրած օրենքի նախագիծը, ԱԺ ՀԱԿ խմբակցության պատգամավոր Հրանտ Բագրատյանը հարց ուղղեց ԱԺ սոցիալական հարցերի հանձնաժողովի նախագահ, ՀՀԿ-ական պատգամավոր Հակոբ Հակոբյանին, թե ինչո՞ւ կուտակայինի հետ կապված հարցերում չի մտցվում հստակություն:

«Ինչո՞ւ եք հասարակությանը աժիոտաժի մեջ գցում, եթե հարցը շատ պրիմիտիվ է, ու կարելի է որոշում կայացնել մի քանի ժամվա ընթացքում, ինչո՞ւ եք ժամանակ ձգում ու հասարակությանը շփոթի մեջ գցում»,- հարցրեց պատգամավորը` հավելելով, որ կուտակայինի հարցով Հակոբ Հակոբյանի հայտարարությունները այնքան միմյանց հակասող են, որ նրա ասածներին վստահելը դարձել է խնդրահարույց:

Հակով Հակոբյանը նախ նշեց, որ օրենքի հետ կապված բարդությունները և ձգձգումը կապված են ՍԴ որոշման հետ, այսինքն` չեն կարգավորվել այն նպատակները, որոնք դրված են եղել հանրության առաջ: «Ով հաշվել է վճարները, թող հաշվի, ով չի հաշվել , պատասխանատվության չի ենթարկվելու: Մենք ասում ենք, թող այս վիճակը մնա` մինչև օրենքի նոր նախագիծը և վերջնական որոշման կայացումը: Խոսում եք վստահությունից, պարո'ն Բագրատյան, Դուք մեկ անգամ մասնակցել եք նախագահի ընտրություններին, մեկ անգամ էլ` ԱԺ նախագահի ընտրություններին, որքա՞ն քվե եք հավաքել, որ խոսում եք վստահությունից: Երբ ՍԴ անդամը հեռուստացույցի առաջ ասում է մեկ բան, տասը րոպե հետո ասում է մեկ այլ բան, ապա ինձանից ի՞նչ եք ուզում»,- նեղսրտեց Հակոբ Հակոբյանը:

Հրանտ Բագրատյանը արձագանքեց, որ նախագահական ընտրություններին հավաքել է ինը տոկոս, որից յոթը գողացվել է հանրապետական թեկնածուին գոհացնելու նպատակով, իսկ ԱԺ նախագահի ընտրություններում ինքը երեք ձայն չի հավաքել, այլ ավելին, և դրա մասին պատգամավորը դեռ բարձրաձայնելու է: «Էդպես մի խոսեք, այլ պատասխանեք իմ հարցին: ՍԴ-ն էլ է ձերը, գուցե զանգենք ՍԴ, հարցնե՞նք, թե ինչ են որոշել, չէ՞ որ դուք եք նշանակել ՍԴ անդամներին, չէ որ մարդիկ չգիտեն` ինչ անեն»,- ասաց Հրանտ Բագրատյանը: