Թուրքական արտադրության դիմակները մեծ աղմուկ են բարձրացրել Հունաստանի խորհրդարանում

Հունաստանի խորհրդարանի պատգամավորների շրջանում «Պատրաստված է Թուրքիայում» գրառմամբ բժշկական դիմակների տարածումը մեծ աղմուկ է բարձրացրել:

Ըստ տեղական լրատվամիջոցների՝ Հունաստանի Կոմունիստական կուսակցության (KKE) պատգամավոր Լիանա Կանելին խորհրդարանում ելույթ ունենալիս ուշադրություն է հրավիրել այն փաստին, որ  դիմակներն արտադրվել են Թուրքիայում։

«Այն դիմակները, որոնք դուք մեզ բաժանեցիք խորհրդարանում, Թուրքիայից են։ Գրված է «Պատրաստված է Թուրքիայում»։ Վատ չէ։ Թեև Թուրքիայից միգրանտները չեն կարող մտնել (Հունաստան), բայց կոմերցիոն շահերն անցնում են»,- ասել է նա։

Հունաստանի խորհրդարանի նախագահ Կոնստանտինոս Թասուլասը, լրատվամիջոցների համար մեկնաբանելով թեման, հաստատել է, որ դիմակները պատրաստված են Թուրքիայում։ Նա բացատրել է, որ դիմակների մատակարարման մրցույթը շահել է ամենացածր գին առաջարկած գերմանական ընկերությունը։ Տասուլասի խոսքով՝ չի նկատվել այն փաստը, որ արտադրողը գտնվում է Թուրքիայում։ Նա հավելել է, որ եթե այդ մասին նախապես հայտնի լիներ, ապա դիմակները ձեռք բերելիս կընտրվեր այլ ընկերություն։