Բեռլուսկոնիի հայտարարությունը Մուսոլինիի մասին մեծ աղմուկ է բարձրացրել

Իտալիայի նախկին վարչապետ Սիլվիո Բեռլուսկոնիի հայտարարությունը Մուսոլինիի ֆաշիստական վարչակազմի մասին` արված Հոլոքոստի զոհերի հիշատակի միջազգային օրը, մեծ քաղաքական սկանդալի պատճառ է դարձել. տեղեկացնում է РИА Новости-ն:

Միլանում, որտեղ երեկ անցկացվել են խոշոր միջոցառումներ` ի հիշատակ Հոլոքոստի զոհերի, Բեռլուսկոնին հայտարարել է, որ ֆաշիստական Իտալիայի ռասայական օրենքները Մուսոլինիի ամենամեծ մեղքն են, սակայն միաժամանակ նշել է, որ բռնակալը այլ բնագավառներում օգտակար գործեր է արել: «Հասկանալի է, որ այն ժամանակվա կառավարությունը, երկյուղելով գերմանական պետության լիակատար հաղթանակից, նախընտրեց դառնալ Գերմանիայի դաշնակիցը, քան հակառակորդը: Այդ ալյանսի շրջանակներում էլ մեզ պարտադրվեց հրեաների ոչնչացումը»,- ասել է նա:

Իտալացի այլ քաղաքական գործիչներ Բեռլուսկոնիի այս հայտարարությունը որակել են որպես  «ֆաշիստական բռնակալությունից ամոթալի ռասայական օրենքները տարանջատելու ցինիկ փորձ», «հրեշավոր հիմարություն», իսկ նրան համարել են Մուսոլինիի ծաղրանկարը: