Այս ամենը տանում է դեպի բռնապետություն, պողպատե մանդատ կոչվածը բռնապետություն է․ Ռուբեն Մելքոնյան

Հասարակությանը հրամցվում է սուտ, կեղծ տեղեկատվություն, մանիպուլյացիա իշխանության պատասխանատու անձանց կողմից․ մամուլի ասուլիսում ասաց թուրքագետ Ռուբեն Մելքոնյանը՝ անդրադառնալով հայ–թուրքական հարաբերություններին։

Անդրադառնալով իշխանությունների պնդմանը, թե Հայաստանը Թուրքիային երբեք հողային պահանջներ չի ներկայացրել, նա ասաց, որ  ՀՀ–ն, իրոք, երբեք նման բան չի ներկայացրել, բայց ՀՀ–ն երբեք չի ճանաչել Կարսի պայմանագիրը։ «Թուրքիայի պահանջը 90-ականներին և հիմա այն է, որ մենք ճանաչենք Կարսի պայմանագիրը։ Թուրքիան ունի բարդույթ, Կարսի սինդրոմ, փորձում է հասնել նրան, որ ճանաչեն Կարսի պայմանագիրը»,–ասաց թուրքագետը և նշեց, որ Կարսի պայմանագիրն անօրինական է, և եթե իշանությունները ճանաչեն և ասեն, որ նախկիններն էլ են ճանաչել, դա սուտ կլինի, քանի որ նախկին նախագահները չեն ճանաչել։

Ռուբեն Մելքոնյանը նշեց, որ Թուրքիան իր նախապայմաններից չի հրաժարվել։ «Հայաստանը գնում է Թուրքիայի հետ բանակցությունների միայնակ և խոցելի, ինչը չի կարող մեր պետությանը լավ ապագա խոստանալ»,- ասաց նա։

Անդրադառնալով ԵՊՀ–ի մասին Նիկոլ Փաշինյանի հայտարարություններին, որ իրենք փորձում են ապաքաղաքականացնել ԵՊՀ–ն, Ռուբեն Մելքոնյանն ասաց՝ դու ինչպես կարող ես ԵՊՀ–ին զրկել բնական իրավունքից՝ ունենալ քաղաքական կողմնորոշում։ «Ոչ թե պետք է ապակուսակցականացնել ԵՊՀ–ն, այլ  ստեղծել այնպիսի պայմաններ, որ որևէ մեկը լսարանում կուսակցական քարոզ չանի։ Այս ամենը տանում է դեպի բռնապետություն, պողպատե մանդատ կոչվածը բռնապետություն է։ Արտաքին աշխարհում այս իշխանությունը պարտված իշխանություն է, և այսպիսի ինքնավստահությունը ողբերգություն է»,– ասաց նա։