Որտե՞ղ եք տեսել` 10 մանդատ ունեցողը միանա 5 մանդատ ունեցողին. Էդմոն Մարուքյանը՝ ՕԵԿ-ի հետ համագործակցության մասին

Մանդատները դեռ բաշխված չեն, երբ մանդատները բաշխվեն, այդ ժամանակ կտեսնենք` ինչ կլինի. Yerkir.am-ի հետ զրույցում նշեց անկախ պատգամավոր Էդմոն Մարուքյանը:

Անդրադառնալով Վանաձորում երեկ տեղի ունեցած դեպքին (հիշեցնենք` «Հայկական վերածնունդ» ցուցակը գլխավորող Արկադի Փելեշյանը ծեծի էր ենթարկել Հայ ավետարանական եկեղեցու առաջնորդին)` Մարուքյանը նշեց, որ ինքը չի կարող ասել, թե Փելեշյանին, վերջ ի վերջո, մանդատ կտա՞ն, թե՞ ոչ:

Մեր զրուցակիցը նաև նշեց, որ իրենք քաղաքական ուժի հետ են համագործակցելու, ոչ թե ինչ-որ անհատի, և որ կարևոր չէ` այդ անձը Արկադի Փելեշյա՞նն է, թե՞ որևէ մեկ այլ անձ: «Էական չէ` ի վերջո, նրանք Փելեշյանին կփոխեն այլ անձո՞վ, թե՞ ոչ, մենք համագործակցում ենք քաղաքական ուժերի հետ»,- ասաց պատգամավորը:

Մեր այն հարցին էլ՝ արդյո՞ք էականն այն է, որ «Հայկական վերածնունդ» կուսակցությունը հենց պետք է հայտարարի, որ միանում է «Լուսավոր Հայաստան»-ին, որ այդ միավորումը տեղի ունենա, Մարուքյանն արձագանքեց. «Իհարկե, որտե՞ղ եք տեսել` 10 մանդատ ունեցող ուժը ինքը միանա 5 մանդատ ունեցող ուժին»: