Թուրքիայի խորհրդարանը աջակցություն է հայտնել Ղազախստանին

Թուրքիայի Ազգային մեծ ժողովում (խորհրդարանում) ներկայացված քաղաքական կուսակցությունները Ղազախստանում բռնարարքները դատապարտող համատեղ հռչակագիր են ընդունել ։

Հայտարարությունը ստորագրել են օրենսդիր մարմնի նախագահ Մուստաֆա Շենթոփը, իշխող «Արդարություն և զարգացում» (AKP), Հանրապետական-ժողովրդական (CHP), «Ազգայնական շարժում» (MHP) և «Լավ» կուսակցություն (İYİ Parti) պատգամավորներ։

«Մենք դատապարտում ենք բռնության գործողությունները, որոնք վտանգում են մարդկանց կյանքը, խաթարում հասարակական կարգը և վնասում գույքը»,- ասվում է փաստաթղթում։

Դիմումի հեղինակները հիշեցրել են, որ Թուրքիան աջակցում է Ղազախստանին 1991 թվականի անկախությունից ի վեր։

Ասվում է, որ Անկարան կշարունակի համակողմանի աջակցություն ցուցաբերել Ղազախստանում խաղաղության և կայունության հաստատմանը, ինչը կենսական նշանակություն ունի տարածաշրջանի համար։

Թուրք խորհրդարանականները գոհունակություն են հայտնել այն կապակցությամբ, որ «միջադեպերը սկսել են թուլանալ, և իրավիճակը երկրում սկսել է կարգավորվել ղազախ ժողովրդի ողջախոհության և Ղազախստանի իշխանությունների խոհեմ մոտեցման շնորհիվ»։

Նշենք, որ քրդամետ Ժողովուրդների դեմոկրատական կուսակցությունը այդ փաստաթղթի տակ չի ստորագրել: