Հայաստանը հարաբերությունները կարգավորելու համար պետք է 4 նախապայման կատարի․ Թուրքիայի մեջլիսի նախկին փոխխոսնակ

Թուրքիայի Ազգային մեծ ժողովի նախկին փոխնախագահ, «Թալաթ փաշա» կոմիտեի նախագահ Հասան Քորքմազջանը հայտարարել է, որ Հայաստանը պետք է 4 հիմնական պահանջ բավարարի՝ Թուրքիայի հետ հարաբերություններում նոր էջ բացելու համար:

Ըստ Քորքմազջանի` դրանք են.

1. Հայաստանը պետք է անհապաղ կատարի 2020 թ. նոյեմբերի 9 (10)-ին Ռուսաստանի և Ադրբեջանի հետ ստորագրված հրադադարի համաձայնագրով իր ստանձնած պարտավորությունները:

2. Հայաստանը և Թուրքիան պետք է փոխադարձաբար հարգեն ինքնիշխանություններն ու տարածքային ամբողջականությունները և հայտարարեն խաղաղության մեջ ապրելու մասին:

3. Հայաստանը ՄԻԵԴ-ի Փերինչեք-Շվեյցերիա որոշման հիման վրա պետք է հրաժարվի «Ցեղասպանության ստից»:

4. Երկու երկրների մեջ չպետք է տեղ լինի թշնամության: Այդ շրջանակում, Հայաստանի Շիրակ մարզում Թալեաթ փաշայի և ամբողջ թուրք ազգին նվաստացնող արձանը պետք է անմիջապես հանվի: