ՌԴ ԱԳՆ-ն՝ Հայաստանի և Ադրբեջանի միջև հաղորդակցության վերականգնման մասին

Հարավային Կովկասում բոլոր տնտեսական և տրանսպորտային կապերի ապաշրջափակումը Ադրբեջանի և Հայաստանի միջև հարաբերությունների կարգավորմանն ուղղված աշխատանքի կարևոր ուղղություններից է․ ՏԱՍՍ-ին տված հարցազրույցում ասել է ՌԴ փոխարտգործնախարար Անդրեյ Ռուդենկոն։

Ըստ նրա` խոսքն այն մասին է, որ երկու երկրները կարող են կոնկրետ գործնական օգուտներ քաղել «խաղաղ գոյակցությունից»։

«Ռուսաստանն այս գործընթացի անմիջական մասնակիցն է։ 2021 թվականի հունվարի 11-ին Մոսկվայում կայացած գագաթնաժողովում Ռուսաստանի, Ադրբեջանի և Հայաստանի ղեկավարները պայմանավորվել են ստեղծել եռակողմ աշխատանքային խումբ՝ երեք երկրների փոխվարչապետերի համատեղ նախագահությամբ։ Այս մեխանիզմի շրջանակներում կարևոր նախապատրաստական աշխատանք է կատարվել տարածաշրջանում՝ ինչպես երկաթուղային, այնպես էլ ավտոմոբիլային հաղորդակցության վերականգնման ուղղությամբ։ Ներկայումս մեկ փաթեթ է «հղկվում»։ Այս մոտեցումը կապահովի ընդունված որոշումների կայունությունը»,- ասել է ՌԴ ԱԳՆ ներկայացուցիչը։

Նա նաև նշել է, որ ընթացիկ համատեղ աշխատանքի համար անհրաժեշտ ազդակ են նոյեմբերի 26-ին Սոչիում Ռուսաստանի, Ադրբեջանի և Հայաստանի ղեկավարների համապատասխան պայմանավորվածությունները։

«Մենք կենտրոնանում ենք համատեղ ենթակառուցվածքային նախաձեռնությունների պարամետրերի մշակման և կոնկրետ նախագծերի մեկնարկը հնարավորինս շուտ տալու վրա»,- եզրափակել է Ռուդենկոն: