Բացի «փող տալուց», ինչպիսի՞ մարտավարական ու ռազմավարական նշանակության հրամաններ եք տվել ձեր իսկ միանձնյա որոշմամբ պաշտոնների նշանակվածներին․ Հասրաթյանը՝ Փաշինյանին

Արցախի ՊԲ նախկին խոսնակ Սենոր Հասրաթյանը ֆեյսբուքյան իր էջում անդրադարձել է Հանրային հեռուստաընկերությանը տված հարցազրույցում Նիկոլ Փաշինյանի այն հայտարարությանը, որ բանակին անհրաժեշտ գույք ու ռազմատեխնիկա գնելու առաջարկներն իր կողմից երբեք չեն մերժվել։ Սենոր Հասրաթյանն ընդգծել է, որ բանակ ղեկավարելը, երկրի զինված ուժերի գլխավոր հրամանատարությունը ստանձնելը միայն «փող տալով» չի արտահայտվում։ «Բացի «փող տալուց», ինչպիսի՞ մարտավարական ու ռազմավարական նշանակության հրամաններ ու հրահանգներ եք տվել ձեր իսկ միանձնյա որոշմամբ պաշտոնների նշանակված և ձեր ուղղակի ենթակայության տակ գտնված պաշտպանական գերատեսչության պատասխանատուներին»,- իր հարցադրումն է ուղղել նա։

«...Ես ակնկալում եմ, որ պետք է ոչ միայն բուն պատերազմի դրվագները քննվեն, պետք է քննվի բանակաշինության հարցը... 2018 թվականից հետո չի եղել մի դեպք, որ բանակն ասի` մեզ էսինչ բանը պետք է, մենք ասենք` գիտեք ինչ, փող չկա, որպեսզի դա ապահովենք...»,- սա երեկ ասել է ՀՀ վարչապետի պաշտոնն զբաղեցնող անձը...

Եթե ես լինեի զրուցավարի աթոռին նստածը, ի պատասխան այս անհիմն «արդարացման» փորձի, կհարցնեի․

-Իսկ դուք, որպես պատերազմի դեպքում երկրի զինված ուժերի գլխավոր հրամանատարությունը ստանձնող թիվ մեկ պաշտոնյա, ունեի՞ք ձեր սեփական պատկերացումները կամ տեսլականը երեկվա «թալանված» բանակը «վերականգնելու» և այն ավելի մարտունակ դարձնելու ուղղությամբ և, եթե այո, ապա բացի «փող տալուց», ինչպիսի՞ մարտավարական ու ռազմավարական նշանակության հրամաններ ու հրահանգներ եք տվել ձեր իսկ միանձնյա որոշմամբ պաշտոնների նշանակված և ձեր ուղղակի ենթակայության տակ գտնված պաշտպանական գերատեսչության պատասխանատուներին...

Դրանցից մեկին գոնե ես տեղյակ եմ... Տեղյակ եմ, որ դուք ոչ միայն չբավարարվեցիք մինչ պատերազմը կատարած ձեր սխալներով, այլև դրանք շարունակեցիք կատարել նաև պատերազմի ընթացքում... Հիշեցնեմ դրանցից ընդամենը այն, երբ ձեր իսկ որակմամբ ու հրամանով՝ բանակի խորացված հրամանատարական կետից, որպես «ավելորդ մարդիկ», հեռացվեցին այն բարձրաստիճան զինվորականները, որոնց ներկայությունն ու հետագա գործունեությունն, անշուշտ, իր դրական ազդեցությունը կունենար մարտական գործողությունների ընթացքի վրա...

Հ.Գ․ Ունենալ հզոր բանակ և, ըստ այդմ,նաև կուռ պաշտպանություն, նշանակում է նախևառաջ ունենալ գրագետ կառավարում, նոր միայն հարուստ գանձարան...», - գրել է Սենոր Հասրաթյանը։