Մենք մեծացրել ենք մեր ներկայությունը Սևծովյան տարածաշրջանում. ՆԱՏՕ-ի գլխավոր քարտուղար

Մենք մեծացրել ենք մեր ներկայությունը Սևծովյան տարածաշրջանում, քանի որ Սև ծովը ռազմավարական նշանակություն ունի ՆԱՏՕ-ի համար․ասել է ՆԱՏՕ-ի գլխավոր քարտուղար Իենս Ստոլտենբերգը ՆԱՏՕ-ի պաշտպանության նախարարների հանդիպման առաջին օրվանից հետո կայացած մամուլի ասուլիսում։

Ըստ նրա՝ Սևծովյան տարածաշրջանի երեք երկրներ՝ Թուրքիան, Ռումինիան և Բուլղարիան, ՆԱՏՕ-ի անդամ են, և այս տարածաշրջանում կան Դաշինքի երկու շատ մոտ գործընկերներ՝ Վրաստանը և Ուկրաինան։

«Մենք ականատես եղանք Ղրիմի անօրինական բռնակցմանը և Ռուսաստանի ագրեսիվ գործողություններին Սևծովյան տարածաշրջանում։ Մենք մեծացրել ենք մեր ներկայությունը տարածաշրջանում՝ ցամաքում, օդում և ծովում, և շարունակաբար կարևորում ենք այն, ինչ կարող ենք անել՝ մասամբ ավելացնելով մեր ներկայացուցչությունը և անհրաժեշտության դեպքում ուժեր արագ տեղակայելու՝ մեր կարողությունը: Դա այն է, ինչի համար մեզ անհրաժեշտ է մեր ուժերի բարձր պատրաստության մակարդակը»,- ասել է Ստոլտենբերգը։