Համագործակցության համաձայնագիր՝ ՀՊՄՀ-ի և Ուրալի դաշնային համալսարանի միջև

Եռօրյա այցով Մանկավարժական համալսարանում են Բորիս Ելցինի անվան Ուրալի դաշնային համալսարանի Ռուսաստանի պատմության ամբիոնի պրոֆեսոր Վլադիմիր Զապարիյը և նույն համալսարանի Նոր և նորագույն պատմության ամբիոնի դասախոս, դոցենտ Յուլիա Զապարիյը:

Մանկավարժականի և Ուրալի դաշնային Համալսարանի միջև այսօր կնքվեց համագործակցության համաձայնագիր, ըստ որի կծավալվի գիտակրթական, նախագծային և գործարար լուրջ համագործակցություն:

Համաձայնագրով նախատեսվում է նաև իրականացնել ուսանողների, դասախոսների, պրոֆեսորների, հետազոտողների և ասպիրանտների փոխանակման ծրագրեր, մասնագետների փոխադարձ այցելություններ, ինչպես նաև գիտաժողովների, սեմինարների, սիմպոզիումների և ցուցահանդեսների կազմակերպման հարցում ակտիվ համագործակցություն:

«Բորիս Ելցինի անվան Ուրալի դաշնային համալսարանը Ռուսաստանի Դաշնության խոշորագույն կրթական հաստատություններից է. հաճելիորեն զարմացած եմ, որ բուհն ունի 12 ինստիտուտ, շուրջ 160 լաբորատորիա, 35 000 ուսանող և 4000 դասավանդող: Ուսումնասիրելով բուհի կառուցվածքը, ծանոթանալով մասնագիտություններին, գիտակրթական ներուժին, միջազգային կապերին, վստահ կարող եմ ասել՝ բոլոր նախադրյալները կան, որ համագործակցությունը թևակոխի նոր՝ գործնական ոլորտ»,- հանդիպման ընթացքում նշեց ՀՊՄՀ-ի ռեկտորի պաշտոնակատար Աշոտ Խոեցյանը՝ հույս հայտնելով, որ քայլ առ քայլ կվերականգնվեն համագործակցային լավագույն ավանդույթները:

Ուրալի դաշնային համալսարանի ներկայացուցիչները, կարևորելով երկուստեք համագործակցությունը, ընդգծեցին՝ իրենց համալսարանի մեծամասշտաբ լինելու պատճառով համագործակցությունն առավելապես նախանշել են հումանիտար գիտության ոլորտում:

Վերջիններս հույս հայտնեցին, որ համալսարանական համագործակցությունը կունենա շոշափելի արդյունք՝ ներկայացնելով դրա վերաբերյալ մանրամասներ:

ՀՊՄՀ-ի Պատմության և հասարակագիտության ֆակուլտետի դեկան, դոցենտ Էդգար Հովհաննիսյանը, որը երկու բուհերի համագործակցության նախաձեռնողն էր, ընդգծեց, որ արդենիսկ այդ համատեքստում պրոֆեսոր Վլադիմի Զապարիյը նույն ֆակուլտետի ուսանողներին է ներկայացրել «Ռուսաստանի արդյունաբերական ժառանգությունը Ուրալում» թեմայով դասախոսությունը:

Առաջիկայում Յուլիա Զապարիյը ևս հանդես կգա «Մեծ եռյակը և մեծ հույսերը. ՄԱԿ-ի ստեղծման պատմությունը» թեմայով դասախոսությամբ։