Թուրքիան հայտարարել է ՄԱԿ-ի հետ սիրիացի փախստականներին վերադարձնելու բանակցությունների մասին

Անկարան աշխատում է ՄԱԿ-ի փախստականների գործակալության հետ սիրիացիներին հայրենիք վերադարձնելու ուղղությամբ. հայտարարել է Թուրքիայի արտգործնախարար Մևլութ Չավուշօղլուն:

«Այժմ միջազգային հանրությունը մեզ աջակցում է փախստականների անվտանգ վերադարձի և հայրենադարձության հարցում: Մենք ՄԱԿ-ի փախստականների հարցերով գերագույն հանձնակատարի հետ աշխատում ենք միգրանտների հայրենադարձության ուղղությամբ, մասնավորապես՝ Սիրիա» - Չավուշօղլուի խոսքերը մեջբերել է BBC-ի թուրքական ծառայությունը։

Թուրքիայում բնակվում են ամենամեծ թվով սիրիացի փախստականները` մոտ 3.7 միլիոն մարդ, որոնք սկսել էին ժամանել Սիրիայում քաղաքացիական պատերազմի սկսվելուց անմիջապես հետո` 2011 թվականից:

Հրապարակումը նշում է, որ ՄԱԿ ՓԳՀ-ն Սիրիան համարում է երկիր, որտեղ փախստականներ ուղարկելը չափազանց վտանգավոր է:

Չավուշօղլուն կոչ է արել միջազգային հանրությանը՝ միասին աշխատել միգրացիայի խնդիրը լուծելու համար:

«Սխալ է դրան անվտանգության տեսանկյունից նայելը: Չի կարելի նաև այս հարցը դիտարկել ռասիստական և ֆաշիստական տեսանկյունից: Մյուս կողմից՝ եթե դա սոցիալական խնդիր է, անհրաժեշտ է այն հանգիստ գնահատել միասին և լուծում գտնել նոր քաղաքականության մշակման միջոցով»,- ասել է նա:

Թուրք պաշտոնյայի խոսքերը հնչել են փախստականների հարցում կառավարության քաղաքականության աճող քննադատության ֆոնին: Ըստ BBC-ի՝ Անկարայի երկարամյա «բաց սահմանների» քաղաքականությունը ստեղծել է խիստ հակաիմիգրացիոն վերաբերմունք երկրում գտնվող միլիոնավոր սիրիացիների նկատմամբ։