Թուրքիայի իշխանությունները սիրիացի փախստականներին հարկադրաբար արտաքսում են «անվտանգության գոտի»

Թուրքիայի իշխանությունները սիրիացի փախստականներին  բռնի արտաքսում են Սիրիայի հետ սահմանին գտնվող շրջանը, որտեղ մտադրություն ունեն, այսպես կոչված, «անվտանգության գոտի» ստեղծել. հայտնում է Reuters-ը՝ վկայակոչելով Amnesty International-ին:

Այս պահին Թուրքիայում մոտ 3,6 մլն սիրիացի փախստական է բնակվում: Անկարան հույս ունի մինչև 2 մլն մարդ տեղափոխել Սիրիայի հյուսիս-արևելքում ծրագրվող «անվտանգության գոտի» և շեշտում է, որ ավելի քան 350 000 սիրիացի փախստական վերադարձել է իր երկիր:

Այնուամենայնիվ, Amnesty International-ի տեղեկացմամբ, փախստականները բողոքում են, որ թուրքական ոստիկանությունը սպառնացել է իրենց՝ պարտադրելով փաստաթղթեր ստորագրել, որոնք հաստատում են, որ իրենք իրենց ցանկությամբ են վերադառնում Սիրիա:

«Իրականում Թուրքիան սպառնալիքի տակ է դնում սիրիացի փախստականների կյանքը՝ նրանց ստիպելով ռազմական գործողությունների գոտի վերադառնալ»,- հայտարարել է իրավապաշտպան կազմակերպությունը: 

Amnesty International-ի կարծիքով՝ վերջին ամիսներին հարյուրավոր մարդիկ են հարկադրաբար տեղափոխվել: Կազմակերպությունը տվյալները ստացել է հուլիսից մինչև հոկտեմբեր անցկացված հարցումներով՝ հաստատելով նման 20 դեպք: Արտաքսված սիրիացիներին հաճախ հայտնում են, որ նրանք գրանցված չեն կամ ապրում են թուրքական նահանգի սահմաններից դուրս, ընդ որում՝ մարդկանց արտաքսում են նահանգներից, որտեղ նրանք գրանցված են եղել: