Թալիբներն արգելել են ցույցերը Աֆղանստանում

Աֆղանստանում իշխանությունը զավթած արմատական իսլամիստական «Թալիբան» շարժումը արգելել է փողոցային ցույցերը: Այս մասին ասվում է «Թալիբան»-ի ձևավորած կառավարության ՆԳՆ առաջին պաշտոնական հայտարարության մեջ: Հաղորդվում է, որ ցույցերը խախտողները և կազմակերպիչները կպատժվեն:

Այսուհետ բողոքի ակցիաների կազմակերպիչները պետք է ոչ ուշ, քան 24 ժամ առաջ տեղեկացնեն Արդարադատության նախարարությանը բողոքի ակցիայի պատճառի, վայրի և ժամանակի, ինչպես նաև ենթադրվող կարգախոսների մասին: Արգելքի պատճառ են նշվել հասարակական կարգի խախտումները, որոնք առաջացել են վերջին օրերին «Թալիբան»-ի դեմ բողոքի ցույցերում: Քաբուլում և Հերաթում թալիբները ցրել են բողոքի ակցիաները օդ արձակված կրակոցներով, կան զոհեր․ հայտնում է Deutsche Welle-ն:

Աֆղանստանում ցուցարարների թվում կան բազմաթիվ կանայք, որոնք դժգոհ են թալիբների սահմանած սահմանափակումներից: