Իսրայելում ընթանում են երկրի պատմության ամենամաշտաբային ցույցերը

Հարյուր հազարավոր իսրայելցիներ բողոքի ակցիա են իրականացրել՝ ընդդեմ դատական ​​համակարգը վերակազմավորելու կառավարության ծրագրերի, որը, ըստ կազմակերպիչների, երկրի պատմության մեջ ամենամեծ փողոցային բողոքի ակցիան է, գրում է Haaretz-ը:

Իսրայելի վարչապետ Բենիամին Նեթանյահուն պնդում է, որ փոփոխությունները, որոնք կսահմանափակեն դատարանների լիազորությունները, կվերականգնեն հավասարակշռությունը իշխանության ճյուղերի միջեւ։

Ընդդիմախոսներն ասում են, որ կառավարության ծրագրերը սպառնում են ժողովրդավարությանը:

Շաբաթ օրվա հանրահավաքներից մեկում ընդդիմության առաջնորդ Յաիր Լապիդը տեղի ունեցողն անվանել է Իսրայելի «ամենամեծ ճգնաժամը»։

Շաբաթ օրը բողոքի ակցիայի կազմակերպիչները հայտնել են, որ Իսրայելի ողջ տարածքում փողոց է դուրս եկել մինչեւ 500 հազար ցուցարար:

Մոտ 200 հազար մարդ հավաքվել է Թել Ավիվում՝ շատերը Իսրայելի ազգային դրոշով։

Շաբաթ օրը հյուսիսային Հայֆա քաղաքում երթի է դուրս եկել ռեկորդային՝ 50 հազար մարդ:

Իսրայելում իրավական բարեփոխումների նպատակն է ընտրված կառավարությանը վճռական ազդեցություն տալ դատավորների ընտրության եւ սահմանափակել Գերագույն դատարանի կարողությունը՝ գործադիր իշխանության դեմ որոշում կայացնելու կամ օրենքները բեկանելու հարցում:

Այս հարցը խորը պառակտում է առաջացրել իսրայելական հասարակության մեջ եւ, որ ամենակարեւորն է, հանգեցրել է նրան, որ իսրայելական զինված ուժերի ողնաշարը հանդիսացող պահեստայինները սպառնում են հրաժարվել ծառայությունից՝ իրենց բողոքն արտահայտելու նպատակով։