Տնտեսությունը չի կարող զարգանալ «քայլ արա՝ զարգացիր» սկզբունքով. Թադևոս Ավետիսյան

Ինձ համար մեծ հարց է՝ արդյոք Արցախի և ՀՀ իշխանությունները սոցիալ-տնտեսական, ժողովրդագրական խնդիրների համախումբն իրապես գնահատե՞լ են, սպիտակ թղթի վրա գրե՞լ են՝ հստակ գույքագրելով, ըստ առաջնահերթությունների դասելով, 5-րդ ալիքի եթերում ասել է ԱԺ «Հայաստան» խմբակցության պատգամավոր, տնտեսագետ Թադևոս Ավետիսյանը՝ անդրադառնալով պատերազմի հետևանքով Հայաստանի և Արցախի կրած վնասներին։

Ավետիսյանը հիշեցրել է անցած 30 տարիների ընթացքում Արցախում արված հսկայական ներդրումների կորստի մասին։

«Արցախի ՀԷԿ-երի ամբողջական ցանցը կորցրել ենք։ ՀԷԿ-երով արտադրվող էլեկտրաէներգիան, որպես ամենաէժան էլեկտրաէներգիա, արտահանվում էր Հայաստանի Հանրապետություն։ Ցորեն էր արտահանվում Հայաստանի Հանրապետություն։ Հիմա Արցախը իր պահանջարկը ներկրմամբ է բավարարում։ Եվ միայն դա չէ», – ասել է Ավետիսյանը։

Պատգամավորն անհրաժեշտ է համարել, որպեսզի ՀՀ գործող իշխանությունները հյուծվող տնտեսության պայմաններում մանիպուլյատիվ հայտարարությունների փոխարեն երկարաժամկետ ծրագրեր մշակեն և իրականացնեն, իսկ պատերազմից հետո առաջացած խնդիրները ոչ թե ավելի սրեն, այլ՝ լուծեն։

«Տնտեսական զարգացումը չի կարող հանձնարարելով լինել՝ «տնտեսությու՛ն, քայլ արա՝ զարգացիր»։ Այդպես չի կարող լինել։ Տնտեսությունը համակարգ է, և մանիպուլյատիվ հնարքներով, ինչ-որ մի թիվ վերցնել ներկայացնելով՝ չի զարգանա, մարդու կյանքն էլ չի փոխվի», – ասել է Թադևոս Ավետիսյանը։

Անդրադառնալով Արմեն Չարչյանին կալանքի տակ պահելու փաստին` պատգամավորն ասել է, որ սա իշխանությունների կողմից ընդդիմադիրներին լռեցնելու կոպիտ փորձ է, որն իր նպատակին չի հասնելու:

Մանրամասները՝ տեսանյութում